Deprecated: Methods with the same name as their class will not be constructors in a future version of PHP; plgContentSmartResizer has a deprecated constructor in /storage/content/40/1004740/lawan.org/public_html/plugins/content/smartresizer/smartresizer.php on line 117 Deprecated: Methods with the same name as their class will not be constructors in a future version of PHP; ismartrescanvasCrop has a deprecated constructor in /storage/content/40/1004740/lawan.org/public_html/plugins/content/smartresizer/smartresizer/smartimagehandler.php on line 22 Deprecated: Methods with the same name as their class will not be constructors in a future version of PHP; ismartresimgRedim has a deprecated constructor in /storage/content/40/1004740/lawan.org/public_html/plugins/content/smartresizer/smartresizer/smartimagehandler.php on line 610

ڕاگه‌یه‌ندراو

IMG 20200712 130751 563
خەڵکی خۆشەویستی کوردستان
 
درێژەدەرانی رێگای رزگاری
 
لەو کاتەوە لە ۲۲ ی پووشپەڕدا پێغەمبەری ئاشتی نەتەوەیەکی ئاشتیخوازیان لەسەر مێزی دانووستاندن شەهید کرد، دونیا بۆی دەرکەوت کە رێژیمی تاران نە لە زمانی ئاشتی تێدەگا و نە لە پەیامی ئاشتیخوازان. لەو رۆژەوە ۲۲ی پووشپەر بوو بە زامێکی گەورە و لەبیرنەکراو  بەسەر جەستەی نیشتمان و ماتەمێکی گەورەی لە دڵی رێبوارانی ئازادی لە جیهان دا بە گشتی و رێبواران و قوتابیانی مامۆستای دێمۆکراسی (قاسملووی زانا) بەتایبەتی جێهێشت.
 
دەسەڵاتدارانی خاوەن بیر وباوەری کۆن و نەگونجاو لە گەڵ هیچ سەردەمێک لە تاران پێیان وابوو خەباتی ئازادیخوازی کورد بە شەهید بوونی رێبەری مەزنمان کۆتایی پێدێت و شۆڕش کۆستی دەکەوێ،غافل لەوەیکە قاسملوو خۆی پەروەردەی رێبازی دێموکرات بوو و قوتابخانەکەی رێبازی قاسملوو بەردەوام قوتابی وەفادار و شۆڕشگێر بەرهەم دەهێنێتەوەو تێکۆشانی رێبازی دێموکرات بە ئامانجەکانی گرێدراوە نەک بە تاکەکانییەوە. هەر وەک شەهیدی نەمر خۆی دەفەرمێت کە : " باشترین پاداش بۆ شەهیدان درێژە پێدانی رێگایانە" رێبەرمان تا دوا هەناسە درێژەدەری رێبازی پێشەوا و هاوسەنگەرانی بوو وەکوو چۆن لە ئێستاشدا شۆڕشگێرانی وەفاداری ئەم رێبازە درێژەدەری رێبازی شەهید دوکتور قاسملوو و هاوسەنگەرانین،ئەم بیر و رێبازەیە کە تیرۆریستانی بە چۆکداهێنا و ئارەزووی کۆتایی هاتنی خەبات لە کوردستانی ئێرانی پێ بردنە ناوگۆڕ.
 
لە قاسملوو را قوتابخانەیەکی هزری بەهێز و هێڵێکی خەباتی رزگاریخوازی بۆ گەلەکەی بەجێما کە ئێستاش پاش ۳۱ ساڵ لە شەهید بوونی، بناغە و بنەمای درێژەدانی خەباتە رەواکەمانە. بیر و ئەندیشەی قاسملووی هەمیشە رێبەر ئێستاش رێنوێن و رێنیشاندەری ژنان، لاوان و بەتایبەت خوێندکارانی کوردستانە. ئەوان بە بەرچاو روونی لە وانەکانی قاسملوو بە رێگایەکی پڕ سەروەریدا هەنگاو هەڵدەگرن و تێدەکۆشن بۆ گەیشتن بە داهاتوویەکی گەش و، وانەکانی فێرمان دەکەن( ئەگەر ئێمە ئەرکی خۆمان بەباشی بەرێوە ببەین رەنگە نەسلی داهاتوومان شەهیدی نەبێ). 
  
بیری قاسملوو لە نێو لاوان و ژنان و بەتایبەتی خوێندکاران و نەوەی نوێی کورددا خاوەنی جەماوەر و کۆمەڵانی خەڵکەو وانەکانی دوکتور قاسملوو و بنەما فکرییەکانی هاندەرن بۆ ئەوەی خەباتی نەتەوەکەمان  بە رێگایەکی پڕ سەروەریدا بە داهاتوویەکی گەش بگات. 
قاسملوو ، ئەویندارانی رزگاری و ئازادی فێری باش ژیان کردوو ئەو پەیامەی بە ئێمە گەیاند کە پێویستە نەتەوەی کورد لە پێناو ژیانێکی باش و ئازاددا  خەبات بکات و نرخی ئازادیش بدات.قاسملوو کلتووری خەباتی بەردەوام تا گەیشتن بە ئازادی و ئامانجەکانی بڵاو کردەوە، کلتوورێک کە ئێستاش بە هەزاران رێبواری هەیە و هەر یەک بە جۆرێک خزمەت بە خەباتی نەتەوەیی دەکات.
 
ئێمەش وەکوو رێکخراوە دێموکراتیکەکانی کوردستانی ئێران لەم رۆژە ماتەمینەیەدا لە گەڵ رێبەری مەزن دوکتور قاسملوو وسەرجەم شەهیدانی کوردستان پەیمان نوێدەکەینەوە کە لە رێبازی شەهیدان تا گەیشتن بە ئامانجەکانیان بەردەوام بین و هزری قاسملوو بکەینە هەوێنی خەبات و رزگاری خەڵکی کوردستان.
 
٢٢ی پووشپەڕی١٣٩٩
 
کومیتەی هاوئاهەنگی رێکخراوە دێموکراتیکەکانی کوردستانی ئێران
 
IMG 20200531 WA0006
ڕاگەیەندراوی هاوبەشی یەکیەتییەکانی لاوانی دێموکرات بەبۆنەی ٣٧ساڵەی ئێعدامی ٥٩ لاوی کورد لە مەهاباد
   خەڵکی نیشتمانپەروەری کوردستان!
هەروەک ئاگادارن چوار دەیە لەمەوبەر ڕێژیمی داگیرکەری کۆماری ئیسلامیی ئێران بە کوشتار و هێرش بۆ سەر نەتەوەکانی دیکە بەتایبەت نەتەوەی کورد، لە ئێراندا حکومەتی خۆی دەست پێکرد. سەرەتای دەسەڵاتداریەتیی ئەو ڕێژیمە بە قەبووڵ نەکردن و تواندنەوەی جیاوازییە نەتەوەیی و ئایینییەکان دەستی پێکرد و لەو نێوانەدا نەتەوەی کورد بۆ بەرگری لە مان و مەوجودییەتی خۆی دەستی بە خەباتێکی ڕەوای نیشتمانی کرد و تێچوویەکی زۆری بۆ پارێزگاری لە کەرامەت و ئازادیی خۆی دا.
فتوای جیهاد، جینۆسایدی شار و گوندەکان و کۆمەلکوژی ٥٩ لاوی بێ تاوان لە مەهاباد، لە نمونە دیارەکانی جینۆسایدی نەتەوەکەمان لە لایەن ڕێژیمی کۆماری ئیسلامیی ئێرانەوەن. ڕێژیمی کۆماری ئیسلامی کە باوەڕی بە چارەسەری ئاشتییانەی پرسی کورد نەبووە و پرسی کوردی وەک پرسێکی سیاسی لە ئیران پێناسە نەکردوە و هەمیشە لە گۆشە نیگای ئەمنییەوە سەیری کردووە، بۆ چارەسەرکردنیشی پەنای بۆ شەڕ و کوشتن و جینۆساید بردووە و شەڕی بەسەر نەتەوەکەماندا سەپاندووە، هەربۆیە لەو سەردەمەدا بزووتنەوەی ڕزگاریخوازی نەتەوەکەمان و حیزبی دێموکرات بە تایبەتی، هیچ ڕێگایەکی بۆ نەمابووەوە و بە ناچار دەستی دایە چەک و لە سەنگەری بەرگری لە مان و مەوجودییەتی نەتەوەکەماندا دەستی بە تێکۆشان کرد.
 
  لاوانی بەهەڵوێستی کوردستان!
٣٧ ساڵ پێش ئێستا و لە ١٢ی جۆزەردانی ١٣٦٢دا، ڕێژیم لە ڕەشبگیرییەکدا لە شاری مەهاباد ٥٩ لاوی بێ تاوانی ئیعدام کرد کە بەشێکیان مێرمنداڵ بوون و هێشتا نەگەیشتبوونە تەمەنی یاسایی. ئامانجی ڕێژیم لەو کارە، درێژەدانی کوشتار و چاوترسێن کردنی خەڵک و لاوانی کورد بوو. لە وەڵامی ئەم جینایەتەی دەسەڵاتدارانی تاراندا، هێزی پێشمەرگەی کوردستان کە پێک هاتبوو لە لاوانی بە ئیرادە و بە هەڵوێست،  تێکۆشانی چەکدارانە بۆ پاراستنی شوناسی نەتەوەیی و خاکی کوردستان دەست پێ دەکەن کە تا ئێستاش ئەم تێکۆشانە درێژەی هەیە.
لاوانی شۆڕشگێڕ و میراتگرانی ڕێبازی شەهیدان!
ئێوە کە مێژوویەکی دوور و درێژتان لە بەرەنگاربوونەوەی زوڵم و ستەم هەیە، بە خۆشییەوە لە قۆناغێ نوێ و لە زۆر پرسی نەتەوەیی دیکەشدا دەوری پێشەنگتان هەبووە و بە بۆنەی جۆراوجۆر تێکۆشانی نەتەوەیی و نیشتمانیتان درێژە پێداوە کە دیارترینیان مانگرتنە بەرینەکەی ٢١ی خەرمانانی ١٣٩٧ لە وەڵامی مووشەکبارانکردنی بنکە و بارەگاکانی حیزبی دێموکرات و ئێعدامی تێکۆشەرانی کورد لە ناو زینداندا بووە. ئەو گەرم و گوڕییەی ئێوە لاوانی ڕۆژهەڵات لە خەبات و تێکۆشان، جارێکی تر گرینگیی هاودەنگی و بەیەکەوە کارکردنمان بۆ دەسەلمێنی و ئێمەش ئەو پەیامەتان وەردەگرین. ئێمە وەک یەکیەتییەکانی لاوانی دێموکرات لە پێناو هاودەنگی و کاری هاوبەشدا دەمێکە خەریکی بەستێن سازین، بەستێن سازییەک کە بەیەکەوە پرسەکانی لاوانی کورد بهێنینە بەرباس و بەیەکەوە هەوڵیان بۆ بدەین.
لەو سۆنگەیەوە تێدەکۆشین جینایەتی ئێعدامی بەکۆمەلی ٥٩ لاوی مەهاباد و سەرجەم جینایەت و جینۆسایدەکانی سەر نەتەوەکەمان بە دێکۆمێنت بکەین و هەروەها تێدەکۆشین بە هاودەنگی و بەیەکەوە، لە مەیدانە بەرینە نێونەتەوەییەکاندا ئەم پرسانە بهێنینە گۆڕێ و ماهییەتی ڕێژیمی کۆماری ئیسلامی زیاتر لە جاران بە جیهان بناسێنین و دوژمن بزانێت کە پەروەندەی جینایەتی ١٢ی جۆزەردان و سەرجەم جینایەتەکانی دیکەی، لە ویژدانی مرۆڤایەتی و نەتەوەیی لاوانی کورددا هەر زیندوویە. 
بە هیوای سەرکەوتن  و وەدیهێنانی ئامانجەکانی شەهیدانی کوردستان
یەکیەتیی لاوانی دێموکراتی کوردستانی ئێران
یەکیەتیی لاوانی دێموکراتی رۆژهەڵاتی کوردستان
١٢ی جۆزەردانی ١٣٩٩

IMG 20191216 205654 701

پەیامی کۆمیتەی هاوئاهەنگیی ڕێکخراوە دێموکراتیکەکانی کوردستانی ئێران 

بە بۆنەی نەورۆز و سەری ساڵی نوێی کوردی.
هاونیشتمانانی خۆشەویست!
خوێندکاران، لاوان و ژنانی مافخوازی کوردستان!
جارێکی دیکە نەورۆز، جێژنی نەتەوەیی و مەشخەڵی تاهەتایی شۆڕش و هەستانەوە و هێمای خەبات و ژیانەوەی کورد، رەوڕەوەی هەتاو بە سەر ترۆپكی چیا سەركەشەكانی كوردستانەوە تاو دەدات و لە ئاسۆی بڵیندی نیشتمانەكەمانەوە تێشكی هیوا بە سەر پێدەشت و چیا و خاك و ئاوی تامەزرۆدا دەپرژێنێ و چاوی كۆرپەی دواڕۆژ بە رووی سپێدەیەكی گەشاوەدا دەترووكێنێ.
نەورۆزی ئەمساڵ هاوكاتە لەگەڵ شەپۆلەکانی راچەنین و بەرەنگاریی نەتەوەی کورد و گەلانی ستەملێکراوی ئێران دژ بە كۆنەپەرستی و خەفەقانی دیکتاتۆریی کاولکەری کۆماری ئیسلامی لە ڕۆژهەڵاتی نیشتمان و هەموو ناوچەکانی ژێر دەسەڵاتی ئەو ڕێژیمە سەدە نێوەڕاستییەدا.
ساڵێک کە تێپەڕی، وەکوو هەموو ساڵەکانی دیکەی تەمەنی ئەو دەسەڵاتە نگریسە، ساڵێکی پڕ لە کارەسات و کوێرەوەری بۆ گەلانی ئێران و هەڕەشە بۆ سەر هەموو مرۆڤایەتی بوو. 
هەر لەو ساڵەدا ڕاپەڕێن و خەباتی خوێناویی خەڵک بۆ ڕووخاندنی ڕێژیم، گەیشتە لووتکەی ئازایەتی و وشیاری و گیانبازی و داری ئازادی بە خوێنی باشترین ڕۆڵەکانی نیشتمان ئاو درا و هێڵی جیاکەرەوەی شۆرش و دژە شۆڕش ڕوونتر لە جاران ڕەنگڕێژ کرا.  
ئەمساڵ لە هەلومەرجێکدا بەرەوپیری نەورۆز دەچین کە کەمتەرخەمی و نەزانکاریی ئەو ڕێژیمە دژەمرۆییە، هەڕەشەیەکی گەورەی بۆ سەر ژیانی خەڵک خولقاندووە و بەهۆی سیاسەتەکانی ئەو دەسەڵاتە، نەخۆشیی مەترسیداری کرۆنا لە هەموو شار و ناوچەکاندا هەڕەشە لە ژیان و تەندروستیی خەڵک دەکات.
لەو پێوەندییەدا داوا لە خەڵک دەکەین و خومانیش بە ئەرکدار دەزانین کە بۆ پاراستنی ژیان و تەندروستیی خۆمان و کۆمەڵگاکەمان، شانبەشانی یەکتر بۆ بەرپەرچدانەوەی ئەو هەڕەشەیە، ڕێنوێنییە پزیشکی و تەندروستییەکان ڕەچاو بکەین و پێکەوە هەوڵ بدەین بۆ ئەوەی کە ئەو مەترسییە گەورەیە لە سەر ژینگە و وڵاتەکەمان لاببەین.
كۆمیتەی هاوئاهەنگیی ڕێکخراوە دێموكراتیکەکانی كوردستانی ئێران بە بۆنەی هاتنی نەورۆز و سەری ساڵی نوێ پێرۆزبایی لە ئێوە خەڵكی ئازادیخوازی كوردستان، بە تایبەتی بنەماڵەی سەربەرزی شەهیدانی رێگای رزگاریی كوردستان، زیندانیانی خۆڕاگری سیاسی و تێكۆشەرانی رێگای ماف و ئازادییەكانی گەلی كورد دەكات و ساڵێكی پڕ لە خۆشی و سەركەوتن و بەختەوەریتان بۆ بە ئاوات دەخوازێت.
كۆمیتەی هاوئاهەنگیی ڕێکخراوە دێموكراتیکەکانی كوردستانی ئێران
نەورۆزی ٢٧٢٠ی کوردی.

IMG 20200221 190339 069

پەیامی یەکیەتیی لاوان بۆ ڕۆژی نێونەتەوەیی زمانی زگماکی

کوردستانیانی ئازیز!
لاوانی شۆڕشگێڕ و نەتەوەخوازی نیشتمان!
٢١ فێورییە بەرابەر بە ٢ی ڕەشەمە لە ڕۆژمێری "یونیسکۆ" بۆ یاد و بۆنە نێونەتەوەییەکان، وەک ڕۆژی زمانی زگماکی یاخود زمانی دایکی دیاریکراوە و لەو ڕۆژەدا لە سەرتاسەری جیهان و بە تایبەتی لە وڵاتانی دێموکرات و ئازاد ئەم یادە بەرز ڕادەگیرێت، دیاریکرانی ئەم ڕۆژە لەلایەن "یونسکۆ" وەک ڕۆژی نێونەتەوەیی زمانی زگماکی بۆ ڕێزگرتنە لە شوناس و ناسنامەی نەتەوەکانی جیهان بە تایبەتی بە لەبەرچاوگرتنی ئەو ڕاستییەی کە زمان کۆڵەکەیەکی سەرەکی شوناسی هەر نەتەوەیەک پێکدەهێنێت و زمان زامنی مانەوە و بەردەوامی هەر نەتەوەیەکە.
هاوکات لێکۆڵینەوە زانستییەکان لە بواری زمانەوانییدا دەریانخستووە کە پەروەردەبوونی تاکەکان بە زمانی زگماکی خۆیان کاریگەری ڕاستەوخۆی لەسەر بردنەسەری توانای تاکەکان و ناسینی خۆیاندا هەیە هەربۆیە "یونسکۆ" وەک ڕێکخراوێکی سەر بە نەتەوە یەکگرتووەکان کە لە بواری کولتوور و پەروەردە چالاکە گرینگیەکی تایبەتی بە بواری زمانی نەتەوە جۆراوجۆرەکان دەدات و هاوکات بە گوێرەی هەموو پێوەرە ئینسانی و دێموکراتیکەکان هەر ئینسانێک مافی سروشتی خۆیەتی کە بە زمانی دایکی خۆی بخوێنێت و پەروەردە بێت تاوەکو بتوانێت شوناسی خۆی بپارێزێت و پەرە بە کەسایەتی خۆی بدات.
بێگومان زمان گرینگیەکی زۆری بۆ هەر نەتەوەیەک هەیە و هەروەها بۆ نەتەوەیەک کە نیشتمانەکەی داگیرکرابێت و بەردەوام لەژێر هەڕەشەی ئاسمیلاسیۆنی فیزیکی و کولتووریدا بێت و زمانەکەی وەک هەڕەشەیەک بۆ سەر ئاسایشی نەتەوەیی چاوی لێبکرێت ئەم گرینگیە چەند هێند دەبێت، بۆیە زمانی زگماکی بەردەوام ئامانجێکی گرینگ بووە لە مێژووی جوڵانەوەی ئازادیخوازی کورددا و هەر کاتێک بوار بۆ نەتەوەی کورد ڕەخسابێت کە بە لایەنی کەمی مافەکانی خۆی بگات هەوڵیداوە پەرە بە زمانەکەی خۆی بدات و تاکەکانی کۆمەڵگەی کوردستان بە زمانی دایکی خۆیان بخوێنن و پەروەردەبن باشترین نموونەش خزمەتەکانی "کۆماری کوردستان" ە کە لە ماوەی کەمتر لە یازدە مانگدا توانی بوارێکی لەبار بۆ پەروەردەبوونی منداڵانی کورد بە زمانی زگماکی بڕەخسێنێت و هاوکات هەوڵیش بۆ بڵاوکردنەوەی ڕۆژنامە و گۆڤاری جۆراوجۆر بە زمانی کوردی بۆ چین و توێژەکانی کۆمەڵگەی کوردستان بدات.
لاوانی خۆشەویستی ڕۆژهەڵاتی کوردستان، ڕێژیمی داگیرکەری کۆماری ئیسلامی بەردەوام هەوڵیداوە لە زمان و کولتووری ئێمە بدات و لەم بوارەدا بە پیلان و بەرنامەی دزێو کاری بۆ سڕینەوەی شوناسی نەتەوەییمان کردووە بۆیە لاوان وەکو توێژێکی زیندوو و بوێری کۆمەڵگە ئەرکێکی مێژووی و هەستیاریان لەسەرشانە تاوەکو بە هەوڵ و تێکۆشانی ئاگایانە بتوانن بەرپەرچی ئەم سیاسەتە دزێوەی داگیرکەر بدەنەوە و هەوڵ بۆ پاراستنی کۆڵەکە سەرەکییەکانی شوناسی نەتەوەییمان کە زمان یەکێکە لەو کۆڵەکە سەرەکییانە بدەن.
لەم ڕۆژەدا ئێمە لە یەکیەتیی لاوانی دێموکراتی کوردستانی ئێران، کە ئەو شانازییەمان هەیە یادگاری کۆمارێکی نەتەوەیی و دێموکرات بین ڕێز و ئەمەکی خۆمان بۆ هەموو ئەو مامۆستا و تاکە وشیار و نەتەوەییانە دەنێرین کە هەوڵیان بۆ پەروەردەکردنی منداڵانی کورد بە زمانی زگماکی داوە تا لەو ڕێگەوە شوناسی نەتەوەییمان بپارێزن و سیاسەتی پاکتاوی کولتووری داگیرکەر بکەن بە بڵقی سەرئاو و هاوکات داوا لە لاوانی دەروەست و شۆڕشگێڕی نەتەوەکەمان لە ڕۆژهەڵاتی کوردستان دەکەین کە هەموو هەوڵێکی خۆیان بۆ پاراستنی زمانی دایکی و کولتووری نەتەوەییان بدەن.
سەرکەوێ خەبات بۆ ڕزگاریی نەتەوەی کورد
سڵاو لە لاوانی شۆڕشگێڕ و نەتەوەیی و پێشکەوتنخواز!
یەکیەتیی لاوانی دێموکراتی کوردستانی ئێران

IMG 20200224 102158 183

پەیامی کۆمیتەی بەڕێوەبەریی یەکیەتیی لاوان بە بۆنەی ٧٤هەمین ساڵڤەگەڕی دامەزرانی یەکیەتیی لاوانی دێموکراتی 

کوردستانی ئێران 
    
     
لاوانی چوارپارچەی کوردستان! 
   
  ٧٤ ساڵ لەمەوبەر لە ڕۆژی ٣٠ی ڕێبەنداندا ڕێکخراوی یەکیەتیی لاوانی دێموکراتی کوردستانی ئێران لە ژێر سایەی دەسەڵاتی کۆماری کوردستان، دیارترین هێمای دەسەڵاتدارێتیی نەتەوەکەمان و لە سەر دەستی پێشەوای کوردان لە شاری مەهاباد، پایتەختی کۆمار، دادەمەزرێ. لەو ڕۆژەوە تا ئەمڕۆکە یەکیەتیی لاوان مێژوویەکی پڕ هەوراز و نشێوی تۆمار کردووە و قۆناغی جیا جیای پڕ سەروەریی تێپەڕاندووە، لە هەر قۆناغێکدا نەوەیەکی تازەپێگەیشتووی ئەم خاک و ئاوەی تێکەڵ بە بیری نەتەوەیی و نیشتمان دۆستی کردووە و هەوڵی داوە نەوەی نوێی ئەم زێدە بە ڕێباز و بیری دێموکرات ئاشنا بکات تاکوو ڕێبازی ڕاستەقینەی ڕزگاری بگرێتە بەر. 
  
یەکیەتیی لاوان لە سەرەتای دامەزرانیەوە بە پێی زەمەن و قۆناغەکان، سیاسەتی دروست و کردەوەی پێویستی لە پێناو گەیشتن بە ئامانجەکانی ڕێکخراو و نەتەوەکەمان گرتووەتە بەر و لە ڕابردووەوە تا ئەمڕۆکە چەند قۆناغی جیاوازی تێکۆشانی ڕێکخراوەیی تێپەڕاندووە. 
   
لە قۆناغی یەکەمیدا هەر لە ڕۆژی دامەزرانیەوە تا شۆڕشی گەلانی ئێران، لاوە تێکۆشەرەکانی ڕێکخراو لە پێناو یارمەتیدان بە کۆماری کوردستان و بڵاوکردنەوەی بنەماکانی بیر و باوەڕی دێموکرات و دێموکراسی لە ناو توێژی خوێنگەرمی خۆیاندا دەستیان کرد بە ڕوونکردنەوە و ئاشناکردنی لاوان بەو بنەمایانە لە ڕێگە جۆراوجۆرەکانی بەردەست ، وەکوو بڵاوکرنەوەی گۆڤاوی هاواری نیشتمان، فێرکردنی خوێندن و نووسین بە زمانی کوردی و سازکردنی بەستێن بۆ پێکهێنانی کۆمەڵگایەکی کرراوە و ڕاپەڕاندنی دەیان ئەرکی دیکە لە پێناو خزمەتی زیاتر بە کورد و کوردستان. لە دوای هەرەسهێنانی کۆماری کوردستان و زاڵبوونی کەشێکی پۆلیسیی توند بە سەر کوردستاندا خەباتی یەکیەتیی لاوان دەکەوێتە شێوازێکی نهێنی بەڵام لە چالاکی کردن ناوەستێ و بەردەوام دەبێت لە ڕێگەی بڵاوکردنەوەی بڵاوکراوەی ڕێگا و دامەزرانی کۆمیتەی لاوان لە شاری ورمێ لە لایەن دوکتور قاسملووی نەمر دەست بە کار دەکات و یەکەم ناڕەزایەتی دوای شەهید بوونی حەسەن ڕەمەزانی لە شاری مەهاباد لە لایەن ئەندامانی یەکیەتیی لاوان و ئەندامانی نهێنیی حیزبی دێموکرات ڕێکدەخرێت و بەردەوام سەبارەت بە دۆخی کوردستان تا دەگاتە شۆڕشی گەلانی ئێران بە هەڵوێست بوون. 
    ڕێکخراەکەمان لە قۆناغی دووهەمی خەباتی خۆیدا هەر لە دوای سەرکەوتنی شۆڕشی گەلانی ئێران تا گرتنی کۆنفرانسەکانی یەکەمین کۆنگرەی خۆی بە پێی ئاڵوگۆڕەکانی ئەو سەردەمە و شێوازەکانی خەباتی ئەو دەورانە خۆی نوێ دەکاتەوە و کۆمەڵێک ئەرکی ڕێکخراوەیی پێوەندیدار بە خەباتی ڕێکخراوەیی ڕادەپەڕێنێ و لەو جوگرافیا ئازادەی کە لە سایەی حوزووری پێشمەرگە بەرهەم دێت، ڕێژەی ئەندامان دەگاتە هەزاران کەس و چالاکییەکانی زۆربەی ناوچەکانی کوردستانی ڕۆژهەڵات دەگرێتەوە و لە ڕێکارە جۆراوجۆرەکان بۆ خەباتکردن بە تایبەتی خەباتی هونەری کەڵک وەردەگرێت بۆ ئەوەی خزمەت بە لاوان و ئازادی بکات، بەڵام لە دوای ئەوەیکە فەرمانی شەڕ لە لایەن دەسەڵاتدارانی کۆنەپەرستی ناوەندییەوە دژی ئازادیی کوردستان دەدرێت بۆ دووهەمجار دەیانهەوێت جوغرافیا و ئازادیی کوردستان وەک کۆماری کوردستان داگیر بکەنەوە ئەندامانی یەکیەتیی لاوان، شانبەشانی پێشمەرگە قارەمانەکان، چەک لە شان دەکەن و بەرگری لە خاک و خەڵکی کوردستان دەکەن و ژمارەیەک لە ئەندامانی لاوان لە سەنگەرەکانی ئازادیدا شەهید دەبن. 
    لە ساڵی ١٣٧٨ و دوای گرتنی یەکەم کۆنگرەی ڕێکخراو و داڕشتنی بەرنامە و پێڕەوێکی سەردەمیانە و دیاریکردنی ئامانجەکانی خەباتی ڕێکخراو، قۆناغی سێهەمی کار و تێکۆشانی یەکیەتیی لاوان دەست پێدەکات. لەم قۆناغەدا یەکیەتیی لاوان لە بواری پێوەندی لەگەڵ لاوانی هەر چوار پارچەی کوردستان و ڕێکخراوەکانی تایبەت بە لاوانی جیهان، پێوەندییەکی پتەو دادەمەزرێنێ و دەبێتە یەکێک لە هێزە سەرەکییەکانی بنیاتنەری یەکگرتوویی و یەکبوونی لاوانی کوردستان و بڵیندگۆیەک بۆ گەیاندنی دەنگی لاوانی کوردستانی ڕۆژهەڵات بە گوێی لاوانی جیهان. لەو قۆناغەدا کە ڕێکخراو بە خۆڕێکخستن لەگەڵ پێشکەوتنەکانی دنیای تێکنۆلۆژی و کەڵکوەرگرتن لەم ڕێکارە نوێیە بۆ خەبات زۆرێک لە پیلانە سیستماتیکەکانی کۆماری ئیسلامیی ئێران، بۆ لەناوبردنی لاوانی ئەم نەتەوە ئازادیخوازە، ئاشکرا و پووچەڵ دەکاتەوە.
لە ساڵی ١٣٩٥ و دوای دەست پێکردنی قۆناغێکی نوێ لە خەباتکردن و پێکهێنانی بەستێنێکی بەربڵاوتر لە ڕابردوو، بە خوێندنەوەیەکی نوێ بۆ شێوازی خەباتکردن، قۆناغی چوارەمی خەبات و تێکۆشانی ڕێکخراوەیی یەکیەتیی لاوان دەست پێدەکات. لەم قۆناغەدا کە شار تێیدا چەقی خەباتە و شاخ بزوێنەر و پشتیوانیەتی، رێکخراو هەوڵی داوە کە ببێتە بەشێک لە خەباتی شار و ئەرکی خۆی بەرامبەر بە توێژی کاریگەری کۆمەڵگای ڕۆژهەڵات، کە لاوانن بە جێ بگەیەنێ. لەم قۆناغەدا ڕێکخراو بە سەرنجدان بە دۆخی ناوخۆی ڕۆژهەڵات و دەسەڵاتی داگیرکەری ناوەندی، بە کەڵکوەرگرتن لە ئەزموونەکانی قۆناغەکانی پێشوو وەکوو ڕێنیشاندەرێک بۆ ئامانجی کۆتایی و تێکهەڵکێشکردنی لەگەڵ ڕێکارە نوێیەکانی خەباتکردن بۆ گێڕانی ڕۆڵی کاریگەرتری بەهێزترین توێژی کۆمەڵ، هەوڵی داوە بۆ ئەوەی ئەو پارچەیەی پازێلی شۆڕش، لە شوێنی خۆی جێگیر ببێت. 
    قۆناغی چوارەمی تێکۆشانی ڕێکخراوەکەمان هاوکاتە لەگەڵ دۆخی لەرزۆکی دەسەڵاتی ئێران، کە لە هەر زەمەنێک زیاتر ئەو حکوومەتە لە ڕووخانی خۆی نزیک بووەتەوە. پێکهاتنی ئەم دۆخەی هەنووکەش دەرەنجامی شۆڕشێکی ژێرپێستی لە ماوەی ٤٠ساڵی ڕابردوو لە ئێراندایە کە لە ئێستادا گەیشتووەتە قۆناغی تەقینەوە و هەردەم هەر بابەتێک دەتوانێ ببێتە هەلێک بۆ ئەوەی ئەو شۆڕشە ژێرپێستییە خۆی دەربخات و دەسەڵاتی دژەخەڵکیی کۆماری ئیسلامی وەکوو دەسەڵاتی دیکتاتۆریی پاشایەتی تێک بڕووخێنێت. ڕێکخراوەکەمان لە ماوەی ئەم ٤٠ساڵەی دەسەڵاتداریی کۆماری ئیسلامیی ئێران بەشێک بووە لە خەباتی ڕاستەو خۆ و ناڕاستەوخۆ لە دژی ئەم دەسەڵاتە و هاندەری لاوانی کوردستان بووە بۆ ئەوەی بۆیان ڕوون بکاتەوە کە تاکە ڕێگای دەربازبوون لە ژێر ئەم ستەمە شۆڕش کردن و گەیشتن بە دەسەڵاتێکی سیاسیی کوردییە کە وەک تاکە ڕێگا لە پێشمانە و هیچ لایەنێک لە ژێر ناوی جۆراوجۆردا لە ژێر سایەی دەسەڵاتی کۆماری ئیسلامیدا، جگە لە ڕەواییدان بە دەسەڵاتی داگیرکەری ناوەندی و هەڵخەڵەتاندنی نەتەوەی کورد بۆ چاوەڕوانبوون هەر وەک ٢٠ساڵی ڕابردوو، هیچی تریان لە چنگ نایە، بۆیە لەم قۆناغەددا ڕێکخراو کارکردن بۆ گەیشتن بە قۆناغی شۆڕشی لە نێو لاوانی کورددا کردووە بە ئامانج و هەوڵ دەدات کە لاوەکان شۆڕش بە پێویستیی و پێشمەرجێک بۆ گەیشتن بە ژیانێکی ئاسوودە و ئازاد دابنێن کە لە ڕاستیشدا هەر بەو شێوەیەیە. 
    
لاوانی کوردستان لە ئێستادا لە ژێر دەستی دەسەڵاتێکدا دەژین، کە بە پێچەوانەی وڵاتە ئازادەکانی دنیا، هانیان دەدا بۆ ئەوەی ببنە کەرەستەیەک بۆ گەیشتن بە ئامانجەکانی ئیدئۆلۆژییەکی ئەفسانەیی و بیری جیهادی، و لەناوبردنی وڵاتان دەکاتە کەرەستەیەک بۆ مانەوەی خۆی لە سەر حوکم و تەواوی کەموکۆڕییەکانی دەخاتە پاڵ دوژمنێکی دەرەکی، بەڵام بە پێچەوانەوە سەرچاوەی تەواوی کێشە و گرفتەکان هەر بەڕێوەبەرانی داگیرکەری وڵاتی ئێرانن کە بە هیچ شێوەیەک گۆڕانکاری بۆ بەرەوپێشچوون و خۆنوێکردنەوە لەگەڵ پێوەرەکانی مرڤایەتی لەم سەردەمەدا قبووڵ ناکەن و قازانجەکانیان لە دواکەوتوویی و چەقبەستوویی کۆمەڵگا لە سەردەمی کۆندا دەبیننەوە. 
    لاوانی وڵاتانی ئازادی جیهان بەرددەوام ئامادەی گۆڕان و پێکهێنەری گۆڕانکارییەکانن و خۆیان بە باشترین شێوە بۆ ئەم دۆخە ئامادە دەکەن بۆ ئەوەی نەوەی نوێی جیهان بتوانێ هاوکات لەگەڵ گۆڕانکارییەکانی جیهانی تێکنۆلۆژی و کار و پەروەردە و ئابووری، خۆی بگونجێنێ بەڵام دەسەڵاتی ویلایەتی فەقیه بە عەکسی جیهان و تێنەگەیشتن لە گرینگیی گرێدراوبوونی جیهان بە یەکتری پێش بە هاتن و خۆگونجاندنی لاوانی وڵات لەگەڵ سەردەمی نوێی جیهانی دەگرێت و دەیهەوێت بە مۆنتاژکردنی تێکنۆلۆژیی کۆنترۆڵکراو خۆی بە بنیاتنەر دابنێت. 
ئەوەیکە دەبینین وڵاتی ئێران لە چاو وڵاتانی تری جیهان لە ئاستێکی نزم و دواکەوتوویی دایە دەرەنجامی پێش پێگرتنی دەسەڵاتە لە پێشکەوتن و بەجیهانیبوون، ئەمەش گرینگترین بابەتە کە شۆڕشکردن دەکاتە کردەیەکی گشتگیری پێویست بۆ ئێستای خەڵک و بە تایبەتی لاوان کە دواکەوتوویی ئەم توێژە نەوەیەکی دیکەش لە پێشکەوتنی هاوئاست لەگەڵ لاوانی جیهان دەخات.
لە سەردەمێکدا کە شێوازی سیاسەتکردن و پابەندی بە پێوەرە ئینسانی و جیهانییەکان ڕەوشی وڵات دەخاتە ژێر کاریگەریی ڕاستەوخۆوە، دەسەڵاتی حاکم لە ئێران بۆ بڵاوکردنەوەی بیر و باوەڕی دواکەوتووانەی خۆی سیاسەتێکی هەڵەی لە ئاستی خەڵکی وڵات و خەڵکانی ناوچە و جیهانیش گرتووەتە بەر و بە پەرەپێدانی و دەستێوەردانەکانی لە ڕێگەی هێزە تێرۆریستەکان بووەتە بەرهەمهێنەری دۆخێک کە خەڵک لە ناوخۆی ئێران لە خرابترین دۆخی مومکیندان و خەڵکانی ناوچە و جیهانیش لە دژی ئەم ڕەفتار و کردارەی وڵاتی ئێراندا توندترین هەڵویستیان گرتووە بۆ مەحکوومکردنی دەسەڵاتێک کە مانەوەی لە نێو ئێراندا بە هۆی سەرکوت و زیندان و کوشتنی ئازادیخوازان و لە دەرەوەی ئێراندا لە ڕێگای هێزە تێرۆریستییەکانەوەیە.
ئەوەیکە وەکوو ڕاستییەک لە کۆتایی بەدواداچوونی کێشەکان و ڕێگاچارەکاندا دەردەکەوێت، گۆڕینی ئەم دەسەڵاتەی ئێستایە بە پشت بەستن بە خەڵکی وڵات و هێزە خەڵکییەکانی ئەم وڵاتە بۆ ڕێکخستنی شۆڕشێکی خاوەن پلان بۆ دەسپێک و دوای سەرکەوتنی شۆڕش. 
لە کۆتاییدا سپاسی ئەندامان و پشتیوانە دڵسۆزەکانی ڕێکخراوەکەمان دەکەین کە لە سەرجەم دۆخەکانددا هاوکار و پشتیوانی یەکیەتیی لاوانی دێموکراتی کوردستانی ئێران بوون و لە ٧٤ساڵی ڕابردووەوە تا ئێستاکە ڕێکخراویان کردووەتە خاوەنی مێژوویەک و خەباتێکی بێ پسانەوە و بەردەوام لە پێناو گەیشتن بە ئامانجەکانی لاوانی کوردستانی ڕۆژهەڵات. هەروەها سپاسێکی دووبارەی حیزبی دێموکراتی کوردستانی ئێران دەکەین کە بەردەوام یارمەتیدەر و پشتیوانی یادگارییەکەی کۆماری کوردستان بووە بۆ ئەوەی ڕێکخراوەکەمان گەشەی زیاتر بکات.
  بە هیوای سەرکەوتنی خەڵکی ئادیخوازی کوردستانی ڕۆژهەڵات و لاوانی نیشتمان لە قۆناغی چوارەمی خەبات و تێکۆشانی ڕێکخراودا. 
   
سەرکەوتن بۆ کورد و کوردستان
کۆمیتەی بەڕێوەبەریی یەکیەتیی لاوانی 
دێموکراتی کوردستانی ئێران
٣٠ ڕێبەندانی ١٣٩٨ی هەتاوی