nwebunewe lawan 95 ئەوەی مەبەستمە لەم گوتارەدا ئاماژەی پێ بدەم خوێندنەوەیەکە لەسەر نویگەرایی و ئالووگۆڕ بە تایبەت لە شێوەکاری رێکخراوەیی و کاریگەرییەکانی بخەمە روو.

قۆناغ و هەلوومەرج و شەرایەتەکان هەرکام بە پێی مەوقعیەتی خۆیان پێویستییان بە نوێ بوونەوە هەیە، لە وەک خۆ مانەوە و نەبوونی ئالووگۆڕ، بەرەو راکت مانەوە و  نائۆمێدی و دواکەوتن دەکشێیت.

 

ئێمە وەک یەکیەتیی لاوانی دێموکراتی کوردستانی ئێران بە دوای کۆنگرەی ٨ی رێکخراوەکەمان و پیش ئەوەش  و دوای ئەویش بەردەوام بیر لە نوێبوونەوە و ئالووگۆڕ دەکەین و بەردەوام لە شێوەکار و سیستمی ئەو رێکخراوەیە و پلانی کارییەکانمان، لەهەوڵی گۆڕانکاریین.

رێکخراوەیەکی تایبەت بە لاوان کە ئەگەر چاو لە سرووشت و تایبەتمەندییەکانی قۆناغی لاویەتییش بکەی دەبینین کە لاو توێژێکی ئەکتیڤ و گۆڕانخوازە و بەردەوام بیر لە نوێبوونەوە و ئالوگۆڕ دەکاتەوە. کەوابوو ئێمەش وەک یەکیەتیی لاوان ئەرکدارین و ئەگەر بمانهەوێ لە راستای خواست و چاوەڕوانی ئەو توێژەی چالاکی بۆ دەکەین بچینە پێش، دەبێ هەم خواست و چاوەڕوانییەکانیان لەبەرچاو بگرین هەم پێناسەی قۆناغی لاویەتی بکەینە سەرمەشتی تێکۆشانمان و بەردەوام بیر لە نوێبوونەوە و ئاڵوگۆڕ بکەینەوە.

 

یەکێک لە ئەو ئالووگۆڕانەی بیرمان لێکردەوە و نوێ‌کرایەوە ماڵپەری لاوانە بە دیزاین و نێوەرۆکێکی دیکە کە بتوانین لە ئاستی ئەو چاوەڕوانییانەی توێژی لاو لە کوردستان و بەتایبەت لە کوردستانی رۆژهەڵات لەبواری راگەیاندنەوە هەنگاوێک هەڵبگرین، بەو پێناسەیە کە ماڵپەڕی لاوان:  ماڵپەڕێكی كوردی ـ لاوانەیە، كە هەوڵ دەدات لە ئاست خۆاست ‌و ویستەكانی تاكەكانی نێو كۆمەڵگاكەمان و بە تایبەت توێژی لاو هەنگاو هەڵبگرێت و زیاتر گرینگی بە لایەنی پەروەردەیی و دانی زانیاری و ئاشناكردنی لاوەكان بە باس و بابەتەكانی سەردەم و رەنگدانەوەی ئەو دیاردانەی بەرەوروی توێژی لاو بە گشتی و بەتایبەتی تر لاوانی رۆژهەڵاتی كوردستان و ئێران و سەرجەم لاوانی كورد لە هەرچوار پارچەی كوردستان، بكەین.

 

لەو راستایەشدا وەک راگەیاندنی یەکیەتیی لاوان و بەڕێوەبەرانی ئەو رێکخراوەیە خوازیاری هاوكاری هەموو لایەكین، و داواكارین بە پێشنیار و تێبینی‌یەكانتان و هاوكارییتان لە راستای بەرەوپێشبردنی خودی پێشنیارەكانی ئێوەی ئازیز، هاوكات بە رەخنە و باسكردنی كەموكوڕییەكان، پێكەوە هەموومان بتوانین لە ئاست خواستی تاكەكانی نێو كۆمەڵگاكەمان و بە زمانێكی دیكە خوازیارین كە لە راستای بەجێهێنانی زۆربەی ویستەكانی زۆرینەی خوێنەرانی ماڵپەرەكەدا هەنگاو هەڵبێنینەوە.

خواستەکانمان بۆ نوێبوونەوە، ئاڵوگۆڕ، بەرەوپێشچوون، گۆڕانکاری و نوێنەرایەتی کردنی توێژی لاو و ئەندامانی رێکخراوەکەمان دەکەینە سەرمەشتی تێکۆشانی داهاتوومان و داواکاریشـمان ئەوەیە و پێمان وایە بەیان‌کردنی خواست و بەرەوڕو‌ بوونەوەمان لەگەڵ رەخنە و پێشنیاری دۆستان و لایەنگرانمان هەنگاوەکانمان بەهێزتر دەکات.

ن: جەلال رەوانگەرد