ڕاگه‌یه‌ندراو

لاوان

 
 
وێڕای سڵاو ڕێز
 
هاوڕێیانی خۆشەویست
 
بەبۆنەی نزیکبوونەوەی ۲٦ی سەرماوەز ڕۆژی پێشمەرگەی کوردستان، داوا لەسەرجەم ئەندام و لایەنگران و هۆگرانی ئازادی نەتەوەیی دەکەین، بەشداربن لە هەڵمەتی کەمپینی "پشتیوانی پێشمەرگە" بۆ ئەوەی ئازایەتی و خۆنەوستییی پێشمەرگە بە کۆمەڵگای جیهانی بناسێنین و بتوانین بەو شێوازە پشتگیر خۆمان بۆ پێشمەرگەی کوردستان دەرببڕین.
 
پێشمەرگە ئەو ڕۆڵە چاونەترس و بەهێزەیە کە بۆ ئازادی تاک و کۆمەڵ خەبات دەکات، گیانی خۆی دەخاتەمەترسییەوە، مێژوو گەواهیدەری ئەوەیە کە پێشمەرگە چ ڕۆڵ و پێگەیەکی هەبووە لە وستانەوە دژی ستەم و زۆرداری،لە ڕۆژهەڵاتی کوردستان دەبینین بەهۆی ئەو زوڵم و زۆرەی ڕێژیمی کۆماری ئیسلامی ئێران کە دژ بە کورد دەیکات، پێشمەرگە وەکو پارێزەرێکی گیان فیدا بەرامبەر ئەو دەسەڵاتە دڕندەیە دەوەستێت و پارێزگاری لە خاک و وڵات دەکات.
 
هەروەها لە پارچەکانی دیکەی کوردستانیش دەبینین کە چۆن پێشمەرگە و ڕۆڵە ئازیزەکانی نیشتمان بوێرانە بەرامبەر دەسەڵاتی داگیرکەر دەوەستنەوە و پارێزگاری دەکەن لە سەروەریەکانیان.
 
ئێمە وەکوو یەکیەتی لاوان داوا لەسەرجەم هاوڕێیان و لایەنەکان دەکەین، بە بڵاو کردنەوەی وێنە و ڤیدیۆ خۆتان بەشدار بن لەم کەمپینە دا، بەشداریتان جێی خۆشحاڵی ئێمە و بەهێزتر کردنی هەستی نەتەوەییە.
 
 
 
یەکیەتیی لاوانی دێموکراتی کوردستانی ئێران

photo 2018 08 19 15 01 14

 
 
 
لاوانی خۆشەویستی کوردستان
 
داهاتووەکانی زێڕینی نیشتمان
 
 
دیسان مانگی ڕەزبەر، مانگی چوونە سەنگەری خۆتەیار کردن بە چەکی زانست و فێر بوون هاتەوە، کاتی پێچانەوەی کۆلەپشتی پڕ لە کتێب و لە دەست گرتنەوەی چەکی نووک تیژ و قەڵافەت باریکی پێنووسە.
 
 
لاوانی وریا و بە هەستی نیشتمان
 
 
 هەر وەک ئاگادارن لە دوای ئەم سیاسەتە هەڵە و کارە قێزەونانەی کۆماری ئیسلامی بەرامبەر بە ناوخۆی ئێران و کۆمەڵگای جیهانی گرتوویەتە بەر، بووەتە هۆی ئەوەی کە لە لایەن زۆربەی وڵاتانەوە بخرێتە پەراوێزەوە و زلهێزەکانی وەکوو ئامریکا کە ٤٥٪ ئابووری جیهانی بە دەستەوەیە، گەمارۆی بخاتە سەر و بارودۆخی وڵاتی ئێران رۆژ لە دوای رۆژ بەرەو خراپتر بوون بڕوات و چینی کەم داهاتی کۆمەڵگا رۆژ بە رۆژ برسی‌تر و کەم داهات‌ تر بێت، هەر ئەمەش بۆتە هۆی ئەوەی کە زۆرێک لە بنەماڵەکان نەتوانن منداڵەکانیان بنێرنە قوتابخانە چونکە پارەی کڕینی کەلوپەلی خوێندنی منداڵەکانیان بۆ دابین ناکرێت، ڕێژیم بۆتە هۆکاری دەست هەڵگرتنی هەزاران لاوی تامەزرۆی زانست لە خوێندن و بۆتە هۆکارێک کە لاوانی وڵات نەخوێندەوار بن و کۆمەڵگا بەرەو نەخوێندەواری بچێت. لاوان بە جێگای ئەوەی کە لە پۆلەکانی قوتابخانە بن، ناچارن بۆ بژێوی ژیانی خۆیان ڕوو بکەنە بازاڕەکانی کار و ئەو تەمەنەی کە دەبوو تەرخان بکرێ بۆ خۆپێگەیاندن بە مەبەستی خزمەتێکی باشتر بە کۆمەڵگا، دەبێتە تەمەنێکی پڕ ماندووبوون و پڕ لە ئازار.
 
 
سەرەڕای ئەم هەموو زڵم و ستەمەی کە چەندقات زیاترە بەرانبەر بە نەتەوەی کورد لە وڵاتی ئێران و مافی مرۆڤ کە سەرجەم وڵاتانی جیهان ڕێزی لێ دەگرن، بەڵام لە ژێر سێبەری دەسەڵاتی کۆماری ئیسلامیدا لە ئێران پێشێل دەکرێت، و لە لایەن ڕێژیمەوە نەتەوەکانی وڵاتی ئێران بە قەوم ناو دەبرێت و بەردەوام دەسەڵات هەوڵی تواندنەوەی ئەو نەتەوانە دەدات و ناسنامەی نەتەوەیی بوونیان لێ بستێندرێتەوە، یەکێک لە مافە ڕەواکانی هەر نەتەوەیەک خوێندن بە زمانی دایکییە کە لە یاسای بنەڕەتی وڵاتی ئێراندا باسی لێکراوە و ڕێپێدراوە کە هەر نەتەوەیە بە زمانی دایکی خۆی بخوێنێت، بەڵام تاریک پەرەستان جێبەجێی ناکەن و وەکوو مەترسییەک بۆ سەر دەسەڵاتی خۆیانی دەزانن.
 
 
خوێندن بە زمانی کوردی کە حکوومەت قەدەغەی کردووە و ئەم مافە سەرەکییە بە نەتەوەکانی ئێران و بەتایبەتی نەتەوەی کورد ڕەوا نابینێت، زەربەیەکی زۆری لە بوواری فێربوون و پێگەیشتن لە منداڵان و لاوان داوە، منداڵێک کە تا دەگاتە تەمەنی شەش ساڵ فێری ئەوە دەبێت بڵێ دایە، بابە، نان دەخۆم و دەخەوم، لە قوتابخانە دەبێت فێری زمانێکی نامۆ و نەناسراو بێت کە وەکوو ڕاچەنینێک وایە بۆ ئەم منداڵە و ئەمجارە دەبێت فێری بابا، مادر، غذا میخورم، میخوابم و ...هتد بێت، بەم هۆیەشەوە منداڵەکان تووشی دوو شۆناسی دەبن. بەڵام بە دڵخۆشییەوە نەتەوەکەی ئێمە بەهۆی ئەوەی کە کەسانێکی زانا و ئەدیب و تێگەیشتووی زۆری لە سەرجەم بوارە زانستییەکاندا هەبووە و ئیستاش هەیەتی، دوژمنانی نەتەوەکەمان نەیانتوانیوە بە ئامانجەکانیان بگەن و ناسنامەی کوردبوونمان لێ بستێننەوە.
 
 
لاوانی چاوکراوەی کوردستان، دایک و باوکانی بەڕێز، یەکێک لە ناسنامەکانی هەر نەتەوەیەک زمانی ئەو نەتەوەیە کە نیشاندەری زیندووبوون و مانەوەیەتی، بۆ ئەوەی بتوانین هەرچی زۆرتر خزمەت بە نەتەوەکەمان بکەین، دەبێ بە ئەرکی سەرشانی خۆمان بزانین کە سەرەڕای ئەم هەموو کۆسپ و لەمپەرانە کە لە سەر رێگای فێربوون و خوێندنەوە و نووسین بە زمانی کوردی هەیە لە ژێر دەسەڵاتی داگیرکەردا، هەوڵی ئەوە بدەین لاوان و منداڵان خوێندنەوە و نووسین بە زمانی کوردی فێر بن و لەگەڵ ئەلفـ و بێی  کوردی ئاشنا بن و بتوانن زمان و کولتووری کوردی پەرە پێ بدەن.
 
 
پیرۆز بێت ١ی ڕەزبەر بەرامبەر ۲۳ی سێپتامبر، رۆژی کرانەوەی قوتابخانە و خوێندنگاکان.
هیوای سەرکەوتن بۆ سەرجەم قوتابیان و خوێندکارانی کورد لە هەموو پلەکانی خوێندن و ژیان، دەخوازین.
 
 
یەکیەتیی لاوانی دێموکراتی کوردستانی ئێران
 
 
٣١ی خەرمانانی ۲۷۱۸ی کوردی
۲۲ی سێپتامبری ۲۰۱۸ی زایینی

photo 2018 09 13 14 39 55

 
لاوان میدیا: ناوەندی هاوکاریی حیزبەکانی کوردستانی ئێران بەهۆی پێشوازیە گرمەکەی خەڵکی ڕۆژهەڵاتی کوردستان لە بانگەوازەکەیان
سپاس نامەیەکیان بڵاو کردەوە.
 
دەقی پەیامەکە بەم چەشنەیە:
 
بەپێی ئەو هەواڵ و دێکۆمێنتانەی لە  ڕۆژهەڵاتی کوردستانەوە هەر لە ورمێ و شنۆ، پیرانشار، مەهاباد و سەردەشت و بۆکان و سەقزەوە هەتا دەگاتە بانە، سەوڵاوا، سنە، پاوە، مەریوان و کرماشان و سەرپێلی زەهاو و کەنگاوەر پێمان گەیشتوون و بڵاوبوونەوە، ڕۆژهەڵاتی سەربەرز و شۆڕشگێڕ ئەمڕۆ بەپیر بانگەوازی ناوەندی هاوکاریی حیزبەکانی کوردستانی ئێران و سەرجەم لایەنە سیاسییەکان و چالاکانی مەدەنیی کوردستانەوە هاتوون و بە مانگرتنی گشتی و داخستنی دوکان و بازاڕ،  وێڕای مەحکوومکردنی تاوانەکانی ئێعدامی سێ بەندکراوی سیاسی کوردستان و پەلاماری مووشەکی و پیلانی تیرۆریستی بۆ سەر هێزە سیاسییەکانی ڕۆژهەڵات لە خاکی هەرێمی کوردستاندا،  جارێکی دیکە یەکگرتووانە، جینایەتەکانی ٤٠ ساڵ  دەسەڵاتدارێتی کۆماری ئیسلامی دژ  بە خەڵکی کوردستان و بزووتنەوە حەقخوازانەکەیان مەحکووم و ڕیسوا کردەوە و هاوکات پشتیوانی و پشتگیریی خۆیان بۆ سەرکردایەتیی سیاسیی بزووتنەوەی کورد لە ڕۆژهەڵاتی کوردستان دووپات کردوەتەوە.
 
کۆمەڵانی خەڵکی تێکۆشەری کوردستان!
 
ئەو هەڵوێستە سیاسییە مانادارەی ئێوە سەلماندی کە جینایەتە سیستماتیک و پیلان بۆ داڕێژراوەکانی ڕێژیمی کۆماری ئیسلامی بە درێژایی چڵ ساڵی ڕابردوو بۆ دابڕاندنی جەماوەری کوردستان لە سەرکردایەتی سیاسیی بزووتنەوە ڕەواکەیان، ناسەرکەوتوو و پووچەڵ بووە . هەڵوێستی جێی شانازیی ئەمڕۆتان  جارێکی دیکە دەریخستەوە  کە  گرتن، ئەشکەنجە ، ئێعدام و سێدارە، تێرۆر،  تۆپباران و مووشەکباران، چەواشەکاری و زەخت و گوشار و هەڕەشە و سەرکوت،  ناتوانن ئیرادەی گەلی کورد بۆ درێژەدانی خەبات و تێکۆشان لە پێناو بەدەستهێنانی مافە ڕەوا و سەرەتاییەکانی خۆیان تێک بشکێنن.
 
خەڵکی وشیاری کوردستانی ڕۆژهەڵات!
 
ئێوە بەو مانگرتنە گشتییە بە بەرچاوی هەموو جیهانەوە، بە دۆست و دوژمنتان سەلماند کە ئێمە هەموومان وەک پەیکەرەیەکی یەکگرتوو  و لێک جیانەکراو، سوورین لە سەر ڕێبازی بەرحەقمان بۆ گەیشتن بە ئازادی و، ئەوەندەی دیکە کۆماری ئیسلامیی ئێرانتان لە بەرچاوی گەلانی ئێران و ڕای گشتی جیهانی، سووک و ڕیسوا کرد.
 
 ئێوە بە پێشوازیی پڕشکۆی خۆتان لە بانگەوازی  سەرکردایەتی سیاسیی بزووتنەوەی کوردستان، سەلماندتان کە بزووتنەوەی کوردستان، بزووتنەوەیەکی پێگەیشتوو و پێشکەوتووی بەرینە کە لە کات و ساتی خۆیدا لە هەموو پۆتانسیێل و تایبەتمەندییەکانی خەباتی جەماوەری بە هەموو ڕەهەندەکانییەوە بۆ گەیشتن بە ئامانجەکانی، کەڵک وەردەگرێت.
 
با کۆماری ئیسلامی و هەموو دەستوپێوەندەکانی بزانن  کە کوردستان، سەنگەری لەشکان نەهاتووی خەبات بۆ ئازادییە و، گەلێک کە خاوەنی ئەو ئیرادە پۆڵایینە بێت بۆ ئازادی و مافەکانی، لە هیچ کۆسپ و تەگەرەیەک ناپرینگێتەوە و لە خەبات و تێکۆشان تا گەیشتن بە لوتکەی ئازادی هەدا نادات. 
 
 ناوەندی هاوکاریی حیزبەکانی کوردستانی ئێران، پێکهاتوو لە پێنج حیزب و لایەنی سیاسی، سپاس و پێزانینی گەرمی خۆی لە ئاست  پێشوازیی گەرم و کەم وێنەی ئێوە کۆمەڵانی خەڵکی کوردستان لە بانگەوازی خۆی ڕادەگەیەنێ . بە دەنگەوەهاتن و پشتیوانیی لایەنە سیاسییەکانی دیکە لە بانگەوازی مانگرتنی گشتی و، بەشداریی ژنان و پیاوانی ئازادیخواز، چالاکانی سیاسی و مەدەنی و هەموو چین و تۆێژەکانی کۆمەڵگای کوردستان لەم مانگرتنە گشتییەدا، سەری سەرکردایەتی بزووتنەوەی  کوردی لە ڕۆژهەڵاتی کوردستان و هی خۆشتانی  لە بەردەم هەموو خەڵکی ئێران و جیهاندا بەرز کردەوە  و ئیرادە و بڕیاری گشتیی بۆ خەبات و بەربەرەکانی بەرامبەر ئەم ڕێژیمە دیکتاتۆر و تاوانکارە، پتەوتر کردەوە. ئیوە جارێکی دیکە سەرشۆڕی و زەبوونیتان کردە حاسڵی پیلانگێڕییەکانی ڕێژیمی داگیرکەری کۆماری ئیسلامی و لاپەڕەیەکی پڕشنگدار و  زێڕینی ترتان لە مێژووی خەباتی نەتەوەکەماندا تۆمار کرد کە دەتوانێ ببێت بە سەردەقی قۆناغێکی نوێ لە خەبات بۆ تۆمارکردنی ڕزگاریی یەکجاریمان.
 
ئێوە بە مانگرتنی گشتی و یەکگرتووانەی خۆتان، ئەم پەیامەشتان گەیاندە ئێمە هێزە سیاسییەکانی خۆتان کە ئەگەر یەکدەنگ وهاوخەبات و یەکگرتوو بین، ئێوە سەدقات باشتر بە دەنگمانەوە دێن. ئێمەش لەم ڕۆژە پڕشکۆیەدا بەڵێنتان پێ دەدەین کە بەرامبەر پەیامە پیرۆزەکەی ئێوە سەری ڕێز دادەنوێنین وبە شانازی و بە ئەرکی خۆمانی دەزانین ئەم پەیامەتان لێ وەربگرین.
 
سڵاو لە یەکگرتوویی خۆڕاگری و ئیرادەی خەباتگێڕانەتان.
 

RTGNYIR

 

ئەندامانی یەکیەتیی لاوانی دێموکراتی کورستانی ئێران، هەروەک ئاگادارن، کۆماری تیرۆریستپەروەی ئیسلامیی ئێران لە درێژەی دەست درێژی و هێرشەکانی بۆ سەر کوردستان بەتایبەت پەلامارە تیرۆریستییەکانی بۆ سەر حیزبەکانی ڕۆژهەڵاتی کوردستان، ڕۆژی شەممە ۱۷ی خەرمانانی ۲۷۱۸ی کوردی بەرانبەر لەگەڵ ۸ی سێپتامبری ۲۰۱۸ی زایینی، هەموو هێڵە سەروەرییەکانی هەرێمی کوردستان ــ باشوور، دەبەزێنێت و بە شێوەیەکی نامرۆڤانە لە قووڵایی خاکی باشووری کوردستان، کەمپەکانی ژن و منداڵانی حیزبی دێموکراتی کردە ئامانجی مووشەکەکانی خۆی و لاپەڕەیەکی‌تر ڕەشی لە مێژووی دەستکردی خۆیدا تۆمار کرد.

 

لە ئاکامی ئەو هێرشە نامرۆڤانەی ڕێژیمی کۆماری ئیسلامیدا بەداخەوە پۆلێک هاوڕێ تێکۆشەر و دڵسۆزمان تێکەڵ بە کاروانی سوورخەڵاتی شەهیدان بوون و ڕێژەیەکی زۆریش لە هاوڕێیانمان بریندار بوون، هاوکات لە بەربەیانی هەمان ڕۆژدا سێ لاوی بێ تاوانی کورد لە بەندیخانەی ڕەجایی شاری کەرەج، بە ناوەکانی ڕامین حوسەین‌پەناهی، زانیار و لوقمان مورادی کە تەنیا تاوانیان کوردبوون بوو لە سێدارە دەدات.

 

بە مەبەستی ئیدانە کردن و دەربڕینی ناڕەزایەتی لە هەمبەر سەرجەم کردەوە تیرۆریستییەکانی ڕێژیم بەتایبەتی کردەوە تیرۆریستییەکانی ڕۆژی ۱۷ی خەرمانان/۸ی سێپتامبر، لەلایەن ناوەندی ڕێکخستنی گشتی یەکیەتیی لاوانی دێموکراتی کوردستانی ئێرانەوە بە سەرجەم ئەندامانی ڕێکخراوەکەمان لە باشووری کوردستان و دەرەوەی وڵات ڕادەگەیەنین، چالاکانە پەیوەست بن بەو خۆپشاندان و کۆبوونەوە ناڕەزایەتییانەوە کە ناوەندی هاوکاریی حیزبەکانی کوردستانی ئێران بە هاوکاری حیزبەکانی دیکەی ڕۆژهەڵاتی کوردستان پێکیان هێناون.

 


ناوەندی ڕێکخستنی گشتی یەکیەتیی لاوانی دێموکراتی کوردستانی ئێران

۱۹ی خەرمانانی ۲۷۱۸ی کوردی
۱۰ی سێپتامبری ۲۰۱۸ی زایینی

ROB95XI

 

هاونیشتمانیانی ئازیز
کۆڕ و کۆمەڵە مرۆڤدۆستەکان
هەروەک ئاگادارن، سەر لە بەیانیی ڕۆژی شەممە ١٧ی خەرمانانی ١٣٩٧ی هەتاوی بەرانبەر بە ٨ی سێپتامبری ٢٠١٨ی زایینی، دەسەڵاتی کوردکوژ و داگیرکەری ئێران، جارێکی دیکە ڕقی پەنگخواردووی هەزاران ساڵەی خۆی بە سەر نەتەوەی مافخوازی کورد و ڕۆڵە تێکۆشەرەکانی ئەم گەلەدا هەڵڕشت و بە هۆڤانییەت و دڕندایەتییەک کە هەر لە خۆیان دەوەشێتەوە، جارێکی دیکە خاکی پیرۆزی کوردستانیان بە خوێنی شەریفترین و ئازاترین ڕۆڵەکانی نەتەوەکەمان سوور کرد.
ڕێژیمی مرۆڤکوژی تاران کە ئێستا زیاتر لە هەمیشە، سیمای نگریس و ناخی قیزەونی وەکوو تاقمێکی کاولکەر و دژە شارستانیەت و بەڵایەک بۆ گیانی مرۆڤایەتی و گەلانی ڕۆژهەڵاتی ناوەراست ناسراوە، لە لایەکەوە لە زیندانی ڕەجایی شەهری کەرەج، سێ چالاکی سیاسیی کوردی بە شێوەی دڕندانەی باوی خۆی لە سێدارە دا و لە لایەکی دیکەوە، لە هێرشێکی مووشەکی و ئاسمانیی ترسنۆکانەدا کەمپی بنەماڵەکان و بنکە و بارەگاکانی حیزبی دێموکرات و تێکۆشەرانی ڕێگای ئازادیی کوردستانی کردە ئامانج و لە سەرەمەرگ و بەرەبەری ڕووخانیی یەکجاریی خۆیدا، بۆ جارێکی دیکە سەلماندی کە ترس و دڵەراوکێی لە نەتەوەی کورد و ڕۆڵە تێکۆشەرەکانی لە سەرەوەی هەموو نیگەرانی و دڵەراوکێکانی داناوە و بە هەموو هۆڤانییەت و توانای کاولکاری و خوێنڕشتنیەوە دەیهەوێ لە ئێستاوە تۆڵەی ڕووخان و دواڕۆژی ڕەشی خۆی لە نەتەوەی کورد بکاتەوە.
لە هێرشەکەی دوێنێی کوردکوژانی تاراندا، دەیان ڕۆڵەی تێکۆشەر و ئازا و پێگەیشتووی نەتەوەکەمان و لە نێویاندا چەندین ژن و منداڵ شەهید و بریندار بوون کە لە ڕیزی ئەواندا دەتوانین ئاماژە بە ناوی هاوڕێی پێشمەرگە و ئەندامی بەوەجی یەکیەتیی خوێندکارانی دێموکراتی کوردستانی ئێران، شەهید فارووق حەسەن خەیات بکەین کە وەکوو ئەندامێکی کارا و دڵسۆز، وێڕای بەشداریی چالاکانە لە ئەرکە حیزبییەکانیدا وەکوو مامۆستای فێرگەی دێموکرات، شانی دابووە بەر ڕاپەڕاندنی ئەرکی ڕێکخراوەیی لە یەکیەتیی خوێندکاراندا و ماندوویی نەناسانە لەو بوارەشدا تێدەکۆشا.
شەهیدبوونی ئەو پۆلە تێکۆشەرە کە سەر بە چەند حیزب و ڕێکخراوی جیاجیای کوردستانی ڕۆژهەڵات بوون، پێمان دەڵێ کە ئێمەی کورد چەندەش پەرتەوازە بین و بە هەموو کەلێن و ناکۆکییەکانی نێوانمانەوە، لە ڕوانگەی دوژمنانەوە هەر یەک تاوانمان هەیە کە کوردبوون و پێداگری لە سەر کوردستانی بوونمانە و یەک سزاشمان بۆ دیاری کراوە کە ئەویش ژینۆساید و کوشتن و ماڵوێرانییە.
لە بەرانبەر ئەو هەموو لێبڕاوییەی داگیرکەراندا بۆ دژایەتیکردن و ژینۆسایدی نەتەوەی کورد، ئێمەش دەبێ لێبڕاوانە و زیاتر لە هەمیشە، بەو قەناعەتە بگەین کە یەکخستنی ڕیزەکان و وە سەر یەکخستنی تواناکانمان، باشترین شێوازی ڕێزگرتن و پاراستنی حورمەتی ئەو خوێنە بە ناهەق ڕژاوانە و باشترین میکانیزمی تۆقاندن و ئامادەکاری بۆ ڕاماڵێنی داگیرکەر تا ئەو پەڕی سنوورەکانی کوردستانێکی ئازاد و بەختەوەرە کە لەوێدا چیدی گیان و ماڵ و کەرامەت و ژینگە و سەروەریی خاک و تاکی کورد پێشێل نەکرێت.
ئێمە لە ڕێکخراوەکانی ژنان، لاوان و خوێندکارانی دێمۆکراتی کوردستانی ئێراندا، پێمان وایە کە پێویستە فەرهەنگی تۆڵە لە ناخ و ویژدانی هەموو تاکەکانی کۆمەڵگاکەماندا جێگیر بکرێت و ئەم فەرهەنگە تا دابینکردنی هەموو مافەکانمان و ڕاماڵینی یەکجاریی داگیرکەر لە خاکە پیرۆزەکەمان، ڕێنوێنی تێکۆشانی سیاسی و کۆمەڵایەتی و فەرهەنگیی تاک بە تاکی نەتەوەکەمان بێت.
هەروەها باوەڕمان وایە کە کۆمەڵگەی نێودەوڵەتی ئەگەر تۆزقاڵێک پابەندی دروشم و ڕێسا مۆدێرن و مرۆڤتەوەرانەکانی خۆی بێت و تەنانەت ئەگەر ئازادی و بەختەوەریی مرۆڤ لە وڵاتەکانی خۆیانیشدا بۆیان گرینگە، نابێ چیدی لە بەرانبەر پەلهاوێشتنی دڕندایەتیی و دەستدرێژییەکانی ڕێژیمی مرۆڤکوژی ئێران و خولقاندنی تاوان و ژینۆساید دەرهەق بە نەتەوەی مافخوازی کورد بێ هەڵوێست بێت.
لە کۆتاییدا وێڕای دەربڕینی پەیمانی وەفا و ئەمەگناسی بۆ دوایین شەهیدانی سوورخەڵاتی ڕێگای ڕزگاریی نەتەوەکەمان، هیوا دەخوازین بریندارانی ئەو هێرشە دڕندانەیەش هەرچی زووتر برینەکانیان سارێژ بێتەوە و بە تەندروستی بگەڕێنەوە سەر کار و ژیانی ئاسایی خۆیان.
هەزاران سڵاو لە گیانی پاکی شەهیدانی ڕێگای ڕزگاریی کوردستان
شەرم و ڕیسوایی بۆ خۆفرۆشان و داردەستەکانی داگیرکەر
بڕووخێ ڕێژیمی کوردکوژی کۆماری ئیسلامیی ئێران

یەکیەتیی ژنانی دێموکراتی کوردستانی ئێران

یەکیەتیی لاوانی دێموکراتی کوردستانی ئێران

یەکیەتیی خوێندکارانی دێموکراتی کوردستانی ئێران

١٨ی خەرمانانی ١٣٩٧ی هەتاوی

٩ی سێپتامبری ٢٠١٨ی زایینی