ڕاگه‌یه‌ندراو

photo 2019 02 05 23 21 10

 

 
یەکیەتیی لاوانی دێموکراتی کوردستانی ئێران، کەمپینی "گەیاندنی دەنگی نەتەوەی کورد بە کۆنفڕانسی لەهستان" ڕادەگەیەنێت، بۆ ئەوەی بتوانین دەنگی  کورد بە کۆڕبەندی وارشۆ لە وڵاتی لەهستان بگەیێنین.
 
ڕێکەوتی ٢٤ و ٢٥ ڕێبەندانی ١٣٩٧ هەتاوی کۆنفرانسی "ئاشتی و ئاسایش لە رۆژهەڵاتی ناوەڕاست" ، بە بەشداری چەندین وڵات لە ئاستێکی باڵا، کە لە وڵاتی لەهستان، سەبارەت بە ئێران بەڕێوەدەچێت و تاوتوێ لەسەر ئەو دەستێوەردانانە دەکەن کە ڕێژیمی ئێران  بە بەردەوامی دەیکات لە وڵاتانی ناوچەکە. بەم هۆیەشەوە ئێمە وەکوو نەتەوەی کورد لەهەمبەر ئەو زوڵم و ستەمەی لێمان دەکرێت لەلایەن ڕێژیمی ئێرانەوە و وڵاتانی داگیرکەری دیکەی ناوچەکە، بەم کەمپینە بتوانین دەنگی خۆمان بەو کۆڕبەندە و وڵاتانی جیهانی بگەیەنین، بۆ ئەوەی کۆتایی بە ستەم و زۆرداری دیکتاتۆرەکان بێنین.
 
یەکیەتیی لاوانی دێموکراتی کوردستانی ئێران لە ڕۆژانی بەر لە کۆنفڕاس کەمپێینی گەیاندنی دەنگی نەتەوەی کورد بەو کۆنفڕانسە لە تۆڕە کۆمەڵایەتییەکان بەڕێوە دەبات. 
 
پۆستێر و هەشتەگەکانی پەیوەندیدار پێش لە بەڕێوەچوونی کەمپێینەکە لە لایەن یەکێتی لاوانەوە بڵاو دەکرێنەوە
 
بە بڵاوکردنەوەی ئەو کەمپێینە هاوکارمان بن لە گەیاندنی دەنگی نەتەوەی کورد بە ڕای گشتی جیهان.
 
هاوکاریتان یەکگرتوویمان زیاتر دەکات
 
 
یەکیەتیی لاوانی دێموکراتی کوردستانی ئێران
 
 
 

photo 2019 01 22 13 48 46

 

 
خەڵکی خۆشەویستی کوردستان 
 
ڕێبوارانی ڕێگای ڕزگاری 
 
٢ی ڕێبەندانی ئەمساڵ حەفتاوسێهەمین ساڵڕۆژی  دامەزرانی کۆماری کوردستانە، ڕۆژێک کە بۆ گەلەکەمان بۆتە ڕەمزێک و نەتەوەکەمان وەکوو شانازییەکی مێژوویی ساڵانە ئەم ڕۆژە بەشکۆیە یاد دەکاتەوە. 
 
کۆماری کوردستان لاپەڕەیەکی نوێی لە مێژوو و بیری نەتەوایەتی گەلەکەمان دا تۆمار کردووە  و بۆتە بنەمایەکی فکری و شوێندانەر بۆ خەباتی ڕزگاریخوازی نەتەوەیی لە سەرجەم پارچەکانی کوردستاندا، کۆمارێک کە لەماوەیەکی کورتدا توانی لەو سەردەم و  لەو ناوچەیە دا شێوازێکی نوێ لە دەسەڵاتداری و بەڕێوەبردن بێنێتە ئاراوە. 
 
٢ی رێبەندان وەکوو ڕۆژێکی پیرۆز و کۆماری کوردستان وەکوو دەسکەوتێکی  مێژوویی نەتەوەکەمان دەرئەنجامی هەوڵ و خەباتی بڕگە بڕگەی گەلەکەمان لە زۆربەی ناوچەکانی کوردستان، بە سەمەر گەیشتنی ئەو هەوڵ و گیانفیداییەی ڕۆلەکانی کوردستانە کە نەوە بە نەوە ڕۆحییەی شۆڕشگێری و بەرەنگاریکردنی گواستووەتەوە تا گەیشتووە بە ڕۆلەکانی ژێکاف و لە ژێکافەوە دەگاتە حیزبی دێموکرات و بە دامەزرانی کۆماری کوردستان لە سەر دەستی حیزبی دێموکرات و پێشەوا قازی محەممەد دەگاتە لوتکە. 
 
کۆمار بەرهەمی شێواز و سیستمێکی نوێی خەبات و تێکۆشانی بوو لەو سەردەمە دا، بەر لە کۆمار زۆربەی سەرهەڵدان و شۆڕشەکانی کورد لە چوارچێوەی خێڵ و بە سەرۆکایەتی سەرۆک عەشیرەتێک و لە ناوچەیەکی دیاری کراو دا بوو، بەڵام کۆمار بەرهەمی حیزبێکی مۆدێرن و خاوەن بەڕێوبەریەکی مۆدێڕن و نوێ بوو کە ئێستاش دوای تێپەڕ بوونی ٧٣ ساڵ دەبینین زۆربەی حیزب و ڕێکخراوەکان بۆ پێکهاتە و بنچینەی  بەرنامەیان کاریگەرییان لە بیر و شێوەی کاریی حیزبی دامەزرێنەری کۆمار و ڕێکخراوەکانی دامەزراو لە سەر دەستی کۆمار وەرگرتووە. کۆمار بوو بە سەرەتایەک لە خەباتی سازماندراو کە بە هەرەس هێنانی کۆمار بە کۆتا نەگەیشت و ئێستاش هەر بەردەوامە بۆ گەیشتن بە ئامانجەکانی. 
 
دەسکەوتەکانی کۆمار لە سەرجەم بوارەکانی سیاسی، کۆمەلایەتی، فەرهەنگی، پەیوەندی و کولتووری بە پێی ئەم ماوە کورتەی کە کۆمار دەسەڵاتدار بووە زۆر بەنرخن. لە بەرهەمە هەرە بەرچاوەکانی کۆمار دامەزراندنی ڕێکخراوەی تایبەت بە  لاوان و ژنانە کە دوای ماوەیەکی کورت لە دامەزراندنی کۆمار بۆ گرینگیدان بە توێژەکانی پێکهێنەری کۆمەڵگا بۆ ئەوکات هەنگاوێکی نوێ بووە و ئەم شانازییەشی بەخشیوەتە ئەم ڕێکخراوانە کە ببنە یەکەم ڕێکخراوەکانی تایبەت بە لاوان و ژنان لە مێژووی نەتەوەکەماندا و تا ئێستاش بەردەوام بن لە تێکۆشانی خۆیان و  چەندین ڕێکخراوی دیکەش پەیوەست بوون بە ڕیزی ئەم ڕێکخراوە تێکۆشەرانە و نموونەی هەرە دیاریشیان ڕێکخراوی یەکیەتیی خوێندکارانی دێموکراتی کوردستانی ئێرانە. 
 
لە ئێستاشدا ئێمە وەکوو رێکخراوەکانی لاوان، ژنان و خوێندکارانی دێموکراتی کوردستانی ئێران خۆمان بە ئەمەگناس وبەرهەمی کۆماری کوردستان دەزانین و تا گەیشتن بە ئامانجەکانی کۆمار بێ پسانەوە هەوڵدەدەین و تێدەکۆشین. 
 
پیرۆز بێ ڕۆژی ٢ی رێبەندان لە خەڵکی کوردستان، بنەماڵەی شەهیدان، زیندانیانی سیاسی،سەنگەرنشینانی شاخ و شار و حیزبی دامەزرێنەری کۆماری کوردستان. 
 
سەرکەوێ خەباتی نەتەوەیی دێموکراتیکی  کوردستان بەڕێبەرایەتی حیزبی دێموکراتی کوردستانی ئێران 
 
یەکیەتییەکانی لاوان، ژنان و خوێندکارانی دێموکراتی کوردستانی ئێران 
 
٢ی رێبەندای ١٣٩٧
۲۲ ژانویەی ۲۰۱۹
 

IMG 20181231 010442 235

 
هاوڕێیانی خۆشەویست 
 
 
 
ئێمە وەکوو دەستەی بەڕێوەبەری یەکیەتی لاوانی دێموکراتی کوردستانی ئێران پیرۆزبایی گەرمی خۆمان بەبۆنەی سەری ساڵی زایینی ئاراستەی سەرجەم مەسیحیانی جیهان و کوردستان بەتایبەتی دەکەین.
ھیواخوازین  ساڵی نوێی زایینی ببێتە ساڵی بەدیھاتنی ئاوات و ئامانجەکانی نەتەوەکەمان و ھەموومان پێکەوە دژی ستەمکاران بووەستینەوە و، لە وڵاتێکی ئازاد و کراوە دا لە ساڵی داھاتوو بتوانین لەگەڵ خوشک و برا مەسیحییەکانمان جەژن بگرین.
 
 
بەهیوای ئازادی  و ئاشتی گەلەکەمان
 
 
دەستەی بەڕێوەبەری یەکیەتیی لاوانی دێموکراتی کوردستانی ئێران
 
 
۹ی بەفرانبار ۱۳۹۷ی هەتاوی
۳۰ی دێسامبری ۲۰۱٨ی زایینی
 

photo 2018 12 22 20 16 06

 
خەڵکی خۆشەویستی کوردستان
 
لاوانی خوێن گەرم وبەهەستی کورد 
 
لە ساڵی ١٣٠٩ هەتاوی دا، ساڵێک کە باوکی ناسیۆنالیزمی کورد واتا  “سمکۆی شکاک” شۆڕشگێری راپەڕی و  بە دژی دەسەڵاتی زووڵم و بێداد، بە پیلانی ناجوانمێرانەی دەسەڵات دارانی فارس تیرۆر دەکرێ و شەهید دەبێ. هەر لەو ساڵەدا ئاسمانە پڕ ئەستێرەکەی کوردستان ئەستێرەیەکی گەش و پڕ تیشکی  پێ زیاد دەبێ و لە تاریکترین شەوی ساڵدا رووناکییەکی هەتا هەتایی بەو ئاسمانە دەبەخشرێ و هاورێی هەتاو لە دایک دەبێ. 
 
شەوی یەلدا وەک درێژترین شەوی ساڵ و سەرەتای زاڵ بوونی رووناکی بە سەر تاریکیدا دەناسرێ، لە نێو زۆرێک لە گەڵانی ناوچەکەدا ڕێزیی دەگرن. بەڵام لە نێو نەتەوەی ئێمەدا شەوی یەڵدا جیاوازییەکی مەعنەویی هەیە و  ئەو جیاوازییە پیرۆزیی بەم شەوە بەخشیوە. شەوی یەڵدا هەم بە هۆکارە سروشتییەکەی و هەم بە پیرۆزیی لە دایک بوونی رێبەرێک کە ناسناوی پێغەمبەری ئاشتییان  پێ بەخشیوە، شەوی لە دایک بوونی  قاسملووی مەزن. 
 
نەتەوەکەمان لەو شەوەدا بووە بە خاوەنی  بیرمەندێکی گەورەو رێبەرێکی خۆ نەویست و فیداکار کە خۆشەویستی ئەم مرۆڤە بۆ نەتەوەکەی و بۆ گەیشتن بە ئازادی وایلێکرد  هەموو بەڕژەوەندییە تاکە کەسییەکان و ژیانی ئاسوودەی ئورووپا  جێ بهێلێ و روو بکاتە شاخ و داخی کوردستان بۆ گەیشتن بە ئازادی و مافە رەواکانی نەتەوە بندەست و مافخوراوەکەی و بە لەبەرکردنی جڵ و بەرگی پیرۆزی پێشمەرگایەتیی لە ناو گەرمەی خەبات سەرکردایەتی شۆڕشی وە ئەستۆی خۆی گرتوو چرکە بە چرکە قارەمانییەتی بۆ مێژوو و نەتەوەکەی نووسیەوەو هەتا دوا هەناسەی ژیانی  شۆڕشی پەروەردە کردو هاوکات خۆشی لەگەڵ شۆرش پەروەردە بوو. 
 
ئێمەی لاو دەرسی فیداکاری بۆ گەڕانەوەی کەرامەتی زەوتکراومان لە دوکتوری پێشەنگمان فێربووین کە  دەیفەرموو: “ ئازادی کەرامەت دەبەخشێتە مرۆڤ” لە ئێستاشدا  هەر دەرس و ئەزموونە پڕ بایەخەکانی ئەو رێبەرە لێهاتوەیە  کە وەک مەشغەلێکی رووناکیدەر بۆ تێپەڕ بوون لە تاریکی رێنیشاندەرمانە . یەکێک لەو فاکتە هەرە بەڕچاووانە کە حیزبی دێموکرات ی لە بەرزیدا هێشتۆتەوە رەهەندی  پراکتیکی بوون و دووربوونی حیزبی دێموکرات لە قسەکردنی بێ کردەوەیە کە هەر لە یادگارییەکانی قازی محەممەد و دوکتور قاسملوویە کە بۆ ئێمەی جیلی راسانی بەجێماوە، بیرمەندی زانای فەرانسەوی فیلیپ بۆلانژی دەلێ “ قاسملوو ئاکادیمیستێکی ناسراو بوو ئەو تەنیا بابەت و وتاری ئاکادیمی نەدەنووسی بەڵکوو بە راستی مرۆڤێکی یەکجار زۆر بەکردەوە بوو، واتا نەتەنیا رێبەرێکی سیاسی دوور لە مانۆردان بوو بەڵکوو بەرپرسێکی بە ئەزموونی حیزبی و سەرۆکێکی چریکیش بوو کە دەنگی کەڵاشینکۆف نەیدەترساند” هەر ئەم پراکتیکی بوونەی رێبەران و ئەندامانی حیزبی دێموکراتە کە ئێستاش وەکوو پێشوو خۆشەویستی و متمانەی خەڵکی راگرتووە. 
 
دوکتور قاسملوو بیرمەندێک و کەسایەتییەکی سیاسی بەهێزی نەتەوەکەمان بوو، کە کاریگەری و لێهاتوویی تەنیا لە حیزبی دێموکرات و کوردستانی رۆژهەڵات دا خۆی نەدەدیتەوە و سنوورێکی بەرفرەوانتر لە چواڕپارچەی کوردستانیشی  لە خۆ دەگرت و وەکوو زانایەک و بیرمەندێکی جیهانی  سەیریان دەکرد، زۆرێک لە زانایانی بە نێوبانگی کورد و جیهانیش باوەڕمەندن کە ئەگەر دوکتور قاسملوو تا ئێستا لە ژیان مابا  دۆخی نەتەوەی کورد بە شێوەیەکیتر دەبوو. 
 
دوکتور قاسملوو سەرەتایی خەباتی سیاسی خۆی لە ساڵی ١٣٢٤  لە یەکیەتیی لاوانی دێموکرات لە شاری ورمێ  دەستپێکرد و بناغەی رێکخراوێک بوونیادنرا کە بە چەندەها کەسی لێهاتوو و گیانفیدای  پەروەردە کردووە، ئەو یادگارە پیرۆزەی کۆمار کە شانازی بەبوونی کەسێکی وا زانا وبلیمەت لە مێژوویی خۆیدا دەکات ئێستاش هەر بەردەوامە و بەردەوامیش دەبێت تا گەیشتن بە ئامانجەکانی رێکخراو.  
 
دوکتور قاسملوو بایەخێکی زۆری بە کاری رێکخراوەیی داوە و خۆشی چ لە سەردەمی کۆمار و دوای هەرەس هێنانی کۆمار لە ئەوروپاش بەشداری لە تێکۆشانی یەکیەتیی نێونەتەوەیی خوێندکاران دا دەکرد و لە زۆربە کۆبوونەوەکانی فیدراسیۆنی جیهانی لاوان لە شاری بوداپێست بەشدار بووە، هەر بۆیەش سەرچاوەی ئەم وتە بەنرخەی دوکتور قاسملوو کە دەفەرمووێت:” ڕێکخراو چەکی هەرە گرینگی ئێمەیە” دەتوانێ وردبوونەوەی رێبەری بلیمەتی کورد لە گرینگی کاری رێکخراوەیی وکاریگەری تێوەگلانی توێژەکانی کۆمەڵگا لە ئاستی کوردستان و جیهانیش بە پرسە مافخوازەکانییەوە بێ.
 
لە کاتێکدا یادی شەوی یەڵدا و ٨٨ مین  ساڵیادی لە دایک بوونی رێبەری لێهاتووی نەتەوەکەمان دەکەینەوە کە ئێستاش وتە بەنرخەکان و بەرهەمە  بە جێماوەکانی هزر و ئەندیشەی قاسملوو بوونەتە هەوێنی خەباتی نەتەوەیەکی بندەست و رێبوارانی رێگای ئازادی، بوونەتە هاندەریی هەزاران رۆلەی نیشتمان دۆست و  شۆرشگێری راسانی کە پەیوەست بە ریزەکانی حیزبی دێموکرات و پێشمەرگایەتی دەبن و ئامادەن بۆ گەیشتن بە ئازادی و بەرابەری  هاوشێوەی رێبەری فیداکاری نەتەوەکەمان گیانیان پێشکەش بە رێبازی ئازادی نیشتمان بکەن. 
 
لە کۆتاییدا  پیرۆزبایی  رۆژی لە دایک بوونی  دوکتور قاسملووی هەردەم زیندوو و شەوی یەڵدا لە خەڵکی کوردستان ، بنەماڵەی شەهیدان و یادگارە بەجێماوەکانی  رێبەری خۆشەویستمان دەکەین و بەڵێن دەدەین کە  تا گەێشتن بە ئازادی لە رێبازی  رێبەرانمان بەردەوام بین. 
 
هەر هەبن  ئەو ئەستێرە گەشانەی ئاسمانی کوردستان کە مێژوو و داهاتوو شانازییان پێوە بکات. 
 
یەڵدا خۆش  و یادی قاسملوو بەرز  و بیری بەردەوام 
 
یەکیەتیی لاوانی دێموکراتی کوردستانی ئێران 
یەڵدای ١٣٩٧
 
  

 

photo 2018 12 19 20 44 39

 
لاوان میدیا : ناوەندی ڕاگەیاندنی یەکیەتیی لاوان سپاسنامەیەکی ئاراستەی سەرجەم ئەندام و لایەنگرانی یەکیەتیی لاوان و هۆگرانی ئازادی نەتەوەی، لە ڕاستای پاڵپشتی کردن لە کەمپینی "پشتیوانی پێشمەرگە" دا کرد.
 
دەقی ڕاگەیاندراوەکە بەم چەشنەیە :
 
هاوڕێیانی خۆشەویست
 
خەڵکی تێکۆشەری کوردستان، بە بەشداری کردنتان لە کەمپینی "پشتیوانی پێشمەرگە"، ئەو ڕاستییەتان بۆ جارێکی دیکە سەلماند، کە گەلی کورد بە هەموو چین و توێژەکانییەوە پشتیوان و پاڵپشتی پێشمەرگەیە و پێشمەرگە بە وەدیهێنەری ئامانجە نەتەوەییەکان دەزانێت.
 
ئێمە وەکوو ناوەندی ڕاگەیاندنی یەکیەتیی لاوانی دێموکراتی کوردستانی ئێران، سپاسی سەرجەم ئەندام و لایەنگرانی ڕێکخراوەکەمان و خەڵکی تێکۆشەر دەکەین کە بەپیر بانگەوازی کەمپینەکەمانەوە هاتن و بوون بە دەنگی پێشمەرگە بۆ ناساندنی بە هەموو جیهان.
 
هەروەها بە بەشداری کردنتان لەم کەمپینە نیشاندەری یەکڕیزی و یەک دەنگیمانە و ئەوەتان سەلماند کە ئەم ڕۆڵە گیانفیدایانەی نەتەوەکەمان لە بیر نەکردووە.
هیوادارین بەردەوام بەم شێوە چالاکە، لە خزمەت بەرەو پێشبردن و سەرکەوتنی دۆزی نەتەوەکەمان بن و لە هەوڵدان بۆ گەیاندنی دەنگی ئازادیخوازانەمان بە هەموو دنیا نەوەستن.
 
بێگومان سەرکەوتنمان لە یەک دەنگی یەک ڕیزی هەموو لایەن، ڕێکخراو، چین و توێژەکانی کۆمەڵگاداییە.
 
بەهیوای ئازادی گەلەکەمان
 
ناوەندی ڕاگەیاندنی یەکیەتیی لاوانی دێموکراتی کوردستانی ئێران