IMG 20191216 205654 701

پەیامی کۆمیتەی هاوئاهەنگی رێکخراوە دێموکراتیکەکانی کوردستانی ئێران بە بۆنەی ٢٦ی سەرماوەز  رۆژی پێشمەرگە 

خەڵكی تێكۆشەر و پێشمەرگە پەروەری كوردستان 
پیشمەرگە بەورەکانی گەل و نیشتمان  
بنەماڵەی سەربەرزی شەهیدان و زیندانیانی سیاسی 
ژنان و لاوان و خوێندکارانی عەداڵەتخواز 
هەر نەتەوەیەك هێزێکی تایبەت بە خۆی بەرهەم دێنێت کە گوزراشت لە خەبات و مانەوەی خەباتەکەی بۆ ئامانجە باڵاکانی وڵات و نیشتمان دەکات. لە کوردستان ئەو هێزە پێشمەرگەیە و هەڵگری ناسنامە و شوناسی نەتەوەیی کوردە. وشەی پێشمەرگە، داتاشراو، یان وەرگیراوی هیچ فەرهەنگێكی سیاسی و سەربازیی جیهانی نییە، بەڵكو هەڵقوڵاوی راستەقینەی بیری نەتەوەیی خەڵکی كوردستانه. وشەیەكە پڕ بە مانای خۆی كە كەسێك بۆ وڵاتەکەی خەبات دەكات و لە عەقڵانیەتی نەتەوەییدا لەدایك بووە. ئەگەر سەیری مێژووی خەباتی رزگاریخوازی گەلی كوردستان بكەین، بە باشی هەست دەكەین، پرسی بوون بە پێشمەرگە پرسێكی نەتەوەیی و نیشتمانییە، نەك ئیدیۆلۆژی و حیزبایەتی. تەنانەت تایبەتمەندی مرۆڤتەوەری، مافپارێزەری و کەرامەتپارێزی ئەو هێزە دژی تاریکپەرەستان و دیکتاتۆرەکان بۆ گەیشتن بە ئازادی و دێموکراسی وای کردووە لە هەواڵ و لێکدانەوەی کۆڕە جیهانییەکاندا بە جۆرێکی دیکە چاو لە رۆڵی پێشمەرگە بکرێت و ناوی بهینرێت. 
ئێمە كۆ بووینەتەوە تا ڕێز لە خەباتی ڕەوا و كەسایەتی پیرۆزی هێزێک بگرین، کە هێمای بوون و هەرمانی نەتەوەیی کوردە. هێمای بەرخۆدانی نیشتمانێک كە بووەتە هیوا و ئومێدی هەموو كوردستان و ئاوات و ئارەزووی تاك بە تاكی ژنان و لاوانی كورد بۆ هەڵگرتنی چەكی شەرەفی پێشمەرگایەتی و نیشانەدانی لووتکەی ئیرادەی نەتەوەیی بەرامبەر داگیرکەر. 
رۆژی پێشمەرگە بۆ ئێمە وەبیرهینەرەوەی خاڵێکی مێژووییە لە خەباتی نەتەوەکەمان، واتە سەرکەوتن بە سەر دوایین بنکەی داگیرکاری رێژیمی پاشایەتی لە شارەوانی مەهاباد بە دەستی رۆڵەکانی نیشتمان لە ٧٤ساڵ لەمەوەبەر؛ هەر لەو رۆژەشدابوو ئاڵای داگیرکەران هێنرایە خوار‌و بۆ یەکەمجار ئاڵای پیرۆزی کوردستان لە سەر بڵیندترین بینای شاری مەهاباد هەڵدرا. ئەم سەرکەوتنەش بوو بە دامەزراندنی بناغەی بە ئەکتەربوونی هێزی گەل لە پێکهێنانی ئاڵوگۆڕ و رووبەڕوونەوە بەسەر داگیرکەر لەسەر دەستی هێزی پێشمەرگە و ناساندنی ئەو هێزە وەک بەرەنگاری سەرەکی کوردستان. بەرخۆدانی هێزی پێشمەرگەش زیاتر لە حەوت دەیەی رابردوو، بەڵگەی سەلمێنەری ئەو ڕاستیەیە، بۆیە حیزبی دێموکرات ٣٥ ساڵ پێش ئێستا، بە لێکدانەوەی ئەو مێژووە پڕشنگدارەی پێشمەرگە، ڕۆژی ٢٦ی سەرماوەز، کە هاوکات ڕۆژی هەڵدانی ئاڵای کوردستانیشە، بە رۆژی پێشمەرگە دیاری کرد‌. 
بەرەنگاری هێزی پیشمەرگە دژی داگیرکاری هەر لەو کاتەوە تا هەموو قوناغەکانی شۆڕشی ٤٦- ٤٧‌، شۆڕشی گەلانی ئێران، رووبەرووبوونەوەی فەرمانی جیهادی دژی گەلی تا راسانەوە و هەڵبژاردنی شێوازێکی دیکە لە خەبات، لەگەڵ ئەوەی چەندین قۆناغ و گۆڕانکاری بە خۆوە بینیوە، بەڵام پیشمەرگە بە بەرپرسایەتییەوە ڕێگەی خەباتی درێژەپێداوە و ڕۆڵی پاراستنی "ناسنامەی نەتەوەیی" لەسەر شان هەڵگرتووە؛ لە لایەکی تریشەوە ڕەوایەتی خەباتی ئێمە لەسەر دەستی ئەو باسکە بە هێزە جگە لەوەی لە پاشخانی مەعریفی خەڵکی کوردستان نەهادینە بووە؛ بۆ جیهان و تەنانەت کۆماری ئیسلامیش سەلمێنراوە، هەربۆیە ئەو ڕێژیم لە هیچ پیلانێک دژی هێزی پێشمەرگە درێغی نەکردووە و بچووکترین دەرکەوتنی ئەو هێزە بە چەکی قورس و تۆپ وەڵام دەداتەوە. 
ئەو بەرپرسایەتیە نەتەوەیە، لە ئێستادا لە چوارچێوەی شێوەیەکی نوێی خەبات بۆ تێکۆشانی رۆڵە شۆرشگێڕەکانی نەتەوەکەمان بە ناوی "ڕاسان" لە لایەن حیزبی دێموکراتەوە بۆ گرێدانی خەباتی شاخ و شار دەستی پێکردووە؛ کە ئەوە شارە دەبێتە چەقی پێکهێنانی گۆڕانگارییەکان و سەرهەڵدانی بزوتنەوەیەکی سەراسەری لە پاڵ ئامادەیی و حزووری پێشمەرگە لە پێناو خەباتێکی هەمە لایەنە بۆ بەچۆکداهێنانی دیکتاتۆری؛ بە لەبەرچاوگرتنی ئەوەش کە پێشمەرگە لە سەرەتاوە بەرپرسایەتی و ڕەساڵەتی ڕزگاری نەتەوەیی لەسەر شان بووە و ئەو ڕەساڵاتەش بە پشتیوانی و خەباتی هەمەلایەنەی گەل بەجێدەگەێنرێت و پۆتانسیێلی ڕزگاری نەتەوەیی دەستبەر دەبێ.  
هەربۆیە پێشمەرگە لای ئێمە تەنیا جەنگاوەر نیە، بەڵکوو شۆرشگێڕێکی بە بیروباوەڕ و مرۆڤێکی سیاسیی و کۆمەڵایەتییە کە بووەتە پێشڕەو و هەڵگری پرسی نەتەوەیی کورد؛ بە جۆرێک کە هەڵگری "ناسنامەی نەتەوەیی" کوردە بۆ گەیشتنی ئەو ناسنامە بە سەروەریی سیاسی کوردستان. 
لە ئێستادا کە ڕێژیم لە بوارەکانی ئابووری و کۆمەڵایەتی و سیاسییەوە تووشی داڕمان بووە، لە ئاستی نێودەوڵەتی و سیاسیەوە لە جیهاندا هیچ ئێعتبارێکی نەماوە و بە حکوومەتێکی نائاسایی چاولێدەکرێت و سیاسەتی دەستێوەردانیشی لە وڵاتانی ناوچەکە تووشی شکست بووە، هەروەک دەبینین خەڵکی عێراق چۆن دژی دەستێوەردانەکانی چەندین مانگە بە نرخی خوێن لە شەقامن.
لە ناوخۆشدا لە هەموو بوارەکان ڕووی لە داڕمانە، ئابوورییەکەی ئیفلیج بووە بە جۆرێک کە خەڵک بە ئاشکرا داوای ڕۆیشتنی ئەو ڕێژیمە دەکەن و باوەڕیان بە رێفۆرمخوازەکانی سەر بەو ڕێژیمەش نەماوە. بە شێوەیەک کە لە ئێستادا خەڵک لەبەرەیەک و ڕێژیمیش لە بەرەی خۆیەتی.
 خۆپێشاندانەکانی ئەم دواییانەی مانگی خەزەڵوەریش دەرخەری ئەو راستییە بوون کە بزوتنەوەی سەرانسەری دژی ئەو ڕێژیمە لە ئێران دەستیپێکردووە و هەر چەندە بە توندترین شێوە و بە هێزی چەک سەرکوتکرا و کوشتار و ژینۆسایدێکی تری بەدواوەبوو و بە هەزاران کوژراو و بریندار و دەستبەسەرکران و فەزای میلیتاریزە و ئەمنییەتی لێکەوتەوە، بەڵام تایبەتمەندی بزوتنەوەکان لە چەند ساڵی رابردووە پێشانیداوە کە ئەو بزوتنەوانە هەر جارە و بە شێوەیەکی بەهێزتر دێنە سەرشەقام و داوای نەمانی ئەو ڕێژیمە دەکەن.  
هەر بۆیە لە ئیستادا کە کۆڵەکە سەقامگیرەکانی ئەو رێژیمە لەو پەری لاوازی دان، وەکوو کورد لەگەڵ ئەوەی پێویستیمان بە یەکگرتووی و هاودەنگی هەیە و هاوکات پێویستە لەگەڵ باقی نەتەوەکانی ئێران بۆ ئاڵترنتاتیڤێکی ڕووخێنەر کار بکەین؛ پێشمەرگەش کە هەمیشە ئەرکی پاراستنی نیشتمانی و "ناسنامەی نەتەوەیی" لە ئەستۆ بووە بە پی بەرژەوەندی گەلەکەمان رۆڵ دەبێنێت.  
ژنان و لاوان وخوێندکارانی ئازادیخواز... 
هەموومان بەرامبەر نەتەوەکەمان بەرپرسیارین؛ بەرپرسیار بەرامبەر پاراستنی "ناسنامەی نەتەوەیی" و تێکۆشان لە پێناویی تا گەیشتن بە رزگاری و مافی چارەی خۆنووسین، بۆیە ڕێگەی خەبات لە سەنگەرەکانی پیشمەرگەوە تا سەنگەرەکانی شار درێژەی هەیە و بەردەوامە. بە پەیوەست بوون بەو سەنگەرانەش به‌ هه‌ر شێواز و رێگه‌ و ئامرازێك، دەتوانن ڕۆڵی پیشمەرگەی شاخ یان شار ببینن و ئەرکی نیشتمانی و کوردستانی بە جێبگەێنن و ئەمگناسیمان بۆ خوێنی شەهیدان و خەباتی هەموو قوربانیانی رێگەی ئازادی کوردستان نیشان بدەین.  
بەرز و پیرۆز بێت ٢٦ی سەرماوەز رۆژی پێشمەرگە 
سەرکەوێ جووڵانەوەی رزگاریخوازی کوردستان 
کومیتەی هاوئاهەنگی رێکخراوە دێموكراتیکەکانی كوردستانی ئێران
٢٦ی سەرماوەزی ٢٧١٩ی كوردی