هەواڵی سیاسی

photo 2018 12 16 20 45 51

 
لاوان میدیا: ڕۆژی ۲٦ی سەرماوەز لە چیاکانی کوردستان لەلایەن پێشمەرگەکانی کوردستان بەرز ڕاگیرا

ڕۆژی شەممە ۲٤ی سەرماوەزی ۱۳۹۷ی هەتاوی، لە ڕێوڕەسمێکی تایبەت دا، ڕۆژی پێشمەرگەی کوردستان لەلایەن هەڵۆ تیژباڵەکانی کوردستان بەرز ڕاگیرا.
 
سەرەتای ڕێوڕەسمەکە بە خوێندنی سروودی نیشتمانی ئەی رەقیب و ساتێک بێدەنگی بۆ گیانی پاکی شەهیدانی کورد و کوردستان دەستی پێکرد
 
پاش وەرگرتنی سانی فەرماندەی گشتی هێزی پێشمەرگە لە هێزەکانی ئامادەبوو لە ڕێوڕەسمەکە، ڕێژەی دەستە و هێزەکانی پێشمەرگە کە نیشاندەریی ئەوپەڕی ئامادەیی هێزی پێشمەرگەی کوردستان بوو بەڕێوە چوو.
 
پاشان "کاوە بەهرامی" چەند وتەیەکی پێشکەش بە ئامادەبووان کرد و باسی لە ئازایەتی و گیان فیدای پێشمەرگە کرد، کە چۆن بەرامبەر دیکتاتۆر و سەرەڕۆیی پەت و سێدارەی رێژیم لە هەلومەرجە سەختەکاندا دەوەستێتەوە و بەرگری لە خاک و وڵات دەکات.
 
پاشان وەکوو نەریتێکی ساڵانە لەوحەی ڕێزلێنان درا بەو پێشمەرگە تێکۆشەرانەی کە بێ وەستان لە ڕیزەکانی خەبات دا بوون و کۆڵیان نەداوە بەرامبەر سەختییەکانی خەبات.
 
پاشان لە لایەن پێشمەرگەکانی ئامادەبوو لە ڕێوڕەسم چەندین جوڵەی سەربازی و سەرنج ڕاکێش ئەنجام دران
 
لەکۆتایی ڕێوڕەسمەکە دا بە هەڵپەڕکێ و خۆشی کۆتای بە ڕێوڕەسمی ۲٦ی سەرماوەز هات.
 
 

photo 2018 12 10 18 25 01

 
 
لاوان میدیا: وەزیری دەرەوەی ئامریکا: لە تۆڕی تویتەری خۆی بە سەرنجدان بە ڕۆژی بەرەنگار بوونەوەی گەندەڵی نووسی، حکوومەتی کۆماری ئیسلامی پڕە لە کەسانی گەندەڵ کار و فێڵ باز
 
چەند نموونەش لەو پەیوەندییەدا ناو هێنا،
وەزیری دەرەوەی ئامریکا لە تویتەکەی خۆیدا نووسی، ئایەتووڵڵا خامنەیی کە حیسابەکی بانکی پەڕاوە لە باج، بە بەهای میلیاردها دۆلار هەیە،
مڵکی کەمینە ئایینیەکان داگیر دەکا دواتر ئەوان تەحویلی سپایی پاسداران دەدا.
 
ئەم وزارەت خانەیە: "سادق مەحسوولی" ناو ناوە بە سەرداری میلیاردێر کە شارەزاییەکی تایبەتی لە وەرگرتنی ڕێکەوتنی بیناسازی و نەوتی پڕ قازانج لە کۆمپانیاکانی سپاهیی پاسداران هەبوو.
ئەو ئێستا بە میلیاران دۆلاری سامان هەیە
 
وەزارەتی دەروەی نەتەوە یەکگرتووەکان: لە تویتەکی دیکەدا نووسیەتی کە
 
ئایەتووڵڵا مۆکارم شیرازی،  سۆڵتانی شەرکرە و بە پڕ کردنی بازار لە شەکری هاوردە کراوی پڕخ بەرز، ئێرانییەکانی لە کار بێ کار کرد و، ملیۆنان دۆلاری قازانج کرد.
 
 

20181016 113439

 
 
لەوەتەی کورد ژێر دەستەیە، دەبینین کە زۆر کات بۆ بەدەست هێنانی ئازادی و مافە ڕەواکانی پەنای بردووەتە بەر چەندین ئامراز و کەرەستە یەکێک لەوانە چەکە، لە سەرجەم شۆڕشەکانی کوردستان چەک دەورێکی سەرەکی لە بەرەو پێشبردنی خەباتە ڕەواکەی هەبووە ئەوەش نەوەکو بۆ مەبەستی هێرشکردن بۆ سەر خاک و وڵاتانی نەتەوەکانی دیکە بێت،بەڵکو بۆ بەرگریکردن بووە لە خۆی و خاکی و وڵاتەکەی
 
پاش جەنگی جیهانی دووهەم لە ساڵی ۱۹٤٦ی زایینی گۆڕانکاریەکی نوێ لە جیهاندا هاتە ئاراوە، ئەم گۆڕانکاریانە بوونە هۆی ئەوەی کە شێوازێکی نوێ لە ململانێ بێتە ئاراوە لە نێوان وڵاتانی زل هێز، لە دواتر دا بە شەڕی سارد ناسرا، ئەم گۆڕانکاریە لە جیاتی ئەوەی کە پشت بە شەڕی ڕاستەوخۆ ببەسترێت دەبینین زیاتری پشت بە سیاسەت کردن و بوون بە زل هێزی ناوچەی لە بواری ئابووریەوە بوو، ئەمەش وای کرد کە قەڵەم دەوری خۆی لەو شێوازە نوێیە لە شەڕکردن ببینێت
 
کورد وەکوو نەتەوەیەک کە خاوەنی مێژوویەکی زیاتر لە ۱۰ هەزار ساڵە(بە پێی سەرچاوە مێژوویەکان)، دەبینین لە زۆر کاتەکان دا کورد هەمیشە ژێر دەستەبووە و هەمیشە هەوڵی بۆ بەدەست هێنای ئازادی خۆی داوە ئەویش لە ڕێگای بەکارهێنانی چەکەوە بووە، بەڵام بەداخەوە هەمیشە چەک توانیویەتی بۆماوەیەکی کورت خایەن خەباتەکەی بەرەو پێشەوە بەرێت، ئەمەش دەگەڕێتەوە بۆ ئەوەی کە بزوتنەوە کوردیەکان نەیان توانیوە یاخود بە پێی پێویست بەو شێوە نەبووە لە پاڵ خەباتە چەکداریەکەیان خەبات بە قەڵەمیش بکەن
 
ئەگەر لە ڕابردوو بڕوانین دەبینین کە لە زۆربەی شۆڕشەکانی جیهان دا قەڵەم دەوری کاریگەری بینیوە وەکو شۆڕشی سووری فەڕانسا و شۆڕشی ئیتاڵیا کە شۆڕشگێڕانی ئەو وڵاتە دژ بە دەسەڵاتە فاشیستەکەیان هەڵوێستیان نواند و دژی ڕاپەڕین، هەر چەندە لەو شۆڕشانە دا چەک وەکو ئامارازێکی سەرەکی بەکارهاتووە بەڵام قەڵەمیش دەوری خۆی بینیوە لەسەر خستنی شۆڕشەکە چ وەکوو بواری ئەدەب و هونەر چ وەکوو بواری سیاسی و دیپلۆماسی.
 
ئێمەش دەتوانین وەکو کورد کەڵک لە هەر دوو بوارەکە وەربگرین و هەوڵەکانی خۆمان چڕتر و بەهێز تر بکەین بۆ ئەوەی بتوانین لە ڕووی سیاسیەوە خۆمان پێبگەیەنین چونکە ئێمە چەندێک بتوانین خەباتەکەمان بە چەک پێشبخەین ئەوەندەش دەتوانین بە قەڵەم و خوێندن ئەونەی تر خەباتەکەمان پێشبخەین، ئێمە چ وەکو کورد چ وەکو لاو پێویستە بۆ بەرەو پێشبردنی خەباتەکەمان لە بواری خوێندن و زانست و زانیاریدا خۆمان پێ بگەیەنین 
 
دوکتور قاسملوو ڕێبەرمان لەم پێوەندیەدا دەڵێت : ئەگەر نەسڵی پێش ئێمە ئەرکی خۆی بەباشی بەجێ گەیاندبا ڕەنگە نەسڵی ئێمە شەهیدی نەدەبوو یاخود کەم دەبوو. بۆیە ئەرکی ئەم نەسڵەی لاوانە کە بەباشی ئەرکی سەرشانانیان جێبەجێ بکەن چونکە لاوان لە هەموو کۆمەڵگای جیهاندا بە داینامۆی بەرەو پێشبردنی خەبات دادەنرێت، لەبەر ئەوە دەبێت ئێمەی لاوی کورد هەر چۆنێک پێمان بکرێت بتوانین یارمەتی دەری خەباتەکەمان بین و هەروەها هاوکاری بین بۆ پێش خستنی بۆیە دەبێت ئێمە کار بکەین کە پرسی کورد لە جیهان دا وەکوو نەتەوەیەکی خاوەن مێژووی هەزاران ساڵە کە تاکوو ئێستاش لەژێر ستەم و گوشاری دوژمانی دایە و دەچەوسێنرێتەوە، بەجیهانی بناسێنین و هەروەها تاوەکوو پێمان دەکرێت لەم قۆناغە دا لە ڕابردوو زیاتر یەکڕیز و یەکگرتووبین، 
بۆ ئەوەی خەباتی گەلەکەمان پێشبخەین، و ئەم کاروانە بگەیەنین بە ئامانجە دێرینەکەی خۆی.
 
ئامادەکار: ئارێز شێخی
 
ئەم بابەتە هیچ پەوەندی بە ماڵپەڕەوە نییە بیروبۆچونی نووسەر خۆیەتی

supaipasdaran

 
مانۆڕ نە تەنیا واتا و پێناسەی جیاوازی هەیە و بۆ دەکرێ، بەڵکوو شکڵ و شێوازی جۆراوجۆریشی هەیە و بە پێی هەرکام لەو شکڵ و شێوازانەش ئامانجێکی جیاواز و تایبەت بە خۆی هەیە کە بە پێی ڕێکەوت و شوێنی ئەنجام دانی مانۆڕ تا ئاستێک ئامانجەکانیان ڕوون و ئاشکران. ئەوەی کە لە مێشک و هزری تاکی هەڵکەوتوو لە ناوچەیی ڕۆژهەڵاتی ناڤیندا جێی گرتووە، مانۆڕ تەنیا لە چوارچێوەی نیشاندانی هێزی سەربازیدا خۆی دەبینێتەوە، بەڵام مانۆڕ بە چەند شکڵ و شێوە و پێناسەی جیاوازدا دابەش دەبێ کە هەر کامیان ئامانجێکی تایبەتی هەیە.
-مانۆڕی سەربازی تەک لایەن
-مانۆڕی سەربازی هاوبەش
-مانۆڕی سیاسی،مەدەنی
-مانۆڕی ئابووری و ......هتد
مانۆڕی سەربازی بە واتایی نیشاندانی هێزی سەربازی و توانایی ئەم هێزە بۆ دۆژمنانی وڵاتێک یان هێزێکی چەکدارە، بە تایبەتی ئەگەر ئەم وڵاتە یان ئەم هێزە چەکدارە هەست بە هێرشی بەرامبەر بکات و بە ناڕاستەوخۆ پەیامێک دەداتە هێزی دوژمن، کەواتە مەبەستی ئەنجامدانی مانۆڕی سەربازی پەیامێکە بۆ دەرەوە نەک بۆ ناوخۆ. بە واتایەکی دیکە دەکرێ مانۆڕی سەربازی بە هاوبەشی لە نێوان هێزی سەربازی دوو وڵات دا بەرێوە بچێ، مەبەستی ئەم جۆرە مانۆڕانە دوو لایەنی هەیە: لایەنی یەکم شارەزابوونی یەکێک لەو هێزانە لە جۆگرافیا و تاکتیکی هێزی هاوبەش و وەرگرتنی ئەزموونی نوێیە. لایەنی دووەم، ئەم شێوە مانۆڕانە نیشانەی پتەوبوونی بواری سیاسی و ئابووری ئەم دوو وڵاتە و پەیامێکی هاوبەشە بۆ دوژمنی هاوبەشیان.
 
 
جۆری سێیەمی مانۆڕی سەربازی کە تایبەتمەندە بە وڵاتانی دیکتاتۆر و دەسەڵاتی خۆسەپێن، کە بە مەبەستی ترس و خۆف و چاوترساندنی ناڕەزایەتییە ناوخۆیەکانە. چونکە بەڕێوە بردن و بەڕێوە چوونی مانۆڕی سەربازی لە هەر وڵاتێک دا جیا لە یاسا و ڕێسای نێوخۆیی دەبێ پابەند بوون بە یاسا و ڕێسا جیهانیەکانیش لە بەر چاو بگیرێ، هەر بۆیە وڵاتانی دیکتاتۆر هەموو کات لە بیر و هزری ناوخۆیدا پڕوپاگەندەیی ئەوە دەکات کە وڵات تووشی هەڕەشەی دەرەکی بووە و دەوڵەت دەبێ ڕێگاچارەی پێویست بگرێتە بەر و هەموو کات وانیشان دەدات کە پیلانی دوژمنان بۆ تێکدانی ئاسایش و ئارامشی وڵات پووچەڵکرایەوە، ئەمەش ڕێگا خۆشکەرە بۆ ئەوەی حکومەت لە هەر شوێنێکی وڵات هەست بە ترس و نارەزایەتی بکات بە بیانوی هەڕەشەی دەرەکی هێزی سەربازی بڵاوە پێ بکات و ناڕەزایەتیەکان سەرکووپ بکات. ئێران یەکێک لە وڵاتانەیە کە لە مێژووی چل ساڵ دەسەڵاتداری کۆماری ئیسلامی دا زۆرترین مانۆڕی بەو شێوەیە بەڕێوە بردووە ، هەرچەندە هەموو کات دەسەڵاتدارانی ئێران و بەڕێوەبەرانی ئەم جۆرە مانۆڕانە بۆ بە هێزکردنی هێزی سەربازی و شارەزابوونی ئەم هێزانە لە جۆگرافیا و ئامرازی نوێی سەربازی ڕادەگەیەنن، بەڵام ڕێکەوت و جۆگرافیایی بەڕێوە بردنی ئەم مانۆڕانە سەلمێنەری ئەم ڕاستییەن کە مەبەستی بەڕێوەبردنی ئەم جۆرە مانۆڕانە تەنیا بۆ ترساندن و هەڕەشەکردن لە خەڵکی وەزاڵە هاتووی ئێران ڕێک دەخات. 
 
 
کۆماری ئیسلامی چەندین جار ئەم مانۆڕانەی لە ناوچە جۆراجۆرەکانی ڕۆژهەڵاتی کوردستان بەڕێوە بردووە، بەتایبەتی لە دوای دەستپێکردنی سەر لە نوێ خەباتی سیاسی و سەربازی لە ڕۆژهەڵاتی کوردستاندا کە خۆی لە چوارچێوەی ڕاسانی ڕۆژهەڵاتدا پێناسە دەکات، بێ گۆمان زۆرێک لەو مانۆڕە سەربازییانەی کۆماری ئیسلامی ئێران لە ڕۆژهەڵاتی کوردستاندا کاریگەریی ڕاسانی ڕۆژهەڵات دەردەخات و ترسێکی گەورەی خستوەتە نێو دڵی دەسەڵاتدارە خۆسەپێنەکانی ئێران و خەو و خەیاڵیان بووتە زەهری ڕۆژانەیان، هەر بۆیە بە ئەنجامدانی مانۆڕی تۆقێنەر دەیانهەوێ خەڵکی پێشمەرگە پەروەر و ئازادیخواز و تەژی لەو دەسەڵاتە چاو ترسێن بکەن.
 
 
-مانۆری سیاسی مەدەنی
مانۆڕی سیاسی زۆرتر تایبەتمەندە بە وڵاتانی فرە حیزبی کە تێدا دەرفەتی چالاکی سیاسی زۆر زیادە و حیزب و ڕێکخراوی سیاسی بە ئایدیا و بیرکردنەوەی جیاوازەوە ئازادی چالاکی و سیاسەتکردنیان هەیە، هەر بۆیە هەر جارە و بە شێوەیەکی مەدەنیانە و بە مێتۆدی کاریگەردانان لە سەر بیرو هزری تاکی دەنگدەر کە لە پرۆسە سیاسی و هەڵبژاردنەکاندا پشتیوانیان لێ بکەن و ببنە فاکتەرێک بۆ سەر دەسەڵاتی سیاسی تا باشتر خزمەتی هاووڵاتیانی خۆیان بکەن.
 
 
بە پێچەوانەی مانۆڕی سەربازی لە وڵاتانی دیکتاتۆر لێدراو دا، بە هۆی پشتگوێ خستنی ویست و داخوازەکانی چین و توێژی جۆراجۆری کۆمەڵگا لە لایەن دەسەڵاتەوە و بێ ئاکام مانەوە و بێ هیوابوون لە پێشکەوتن و خزمەتکردن بە هاووڵاتی لە لایەن دەسەڵاتەوە،خەڵکی ئازادیخواز و وەزاڵە هاتوو بە ناچار حیزب و ڕێکخراوی سیاسی و مەدەنی تایبەت بە ماف و خواستەکانی خۆیان بە شێوەی نهێنی و نیوە ئاشکرا پێکدێنن، جا ئەم حیزب و ڕێکخراوانە بە مەبەستی وەرگرتنی مافی نەتەوەیی بن یان تایبەت بن بە توێژێکی تایبەتی نێو کۆمەڵگابن، بۆ نیشاندانی هێز و کاریگەری خۆیان لەسەر بیروڕای کۆمەڵگا و کاریگەر بوون لە سەر دەسەڵات و پڕۆسەی سیاسی لە وڵاتدا بە شێوازی جۆراوجۆر مانۆڕی سیاسی بە شێوەیەکی مەدنییانە ڕێک دەخەن و بوونی خۆیان دەسەلمێنن .
 
 
جیاوازی ئەم مانۆڕانە لەوەدایە کە دەسەڵات بۆ چاوترساندن و تۆقاندنی خەڵک و بە هەزینەیەکی زۆری مادی و زەرەر گەیاندن بە ڕوحیات و ژینگەی جۆگرافیای ناوچەیەک کە بە مەبەست دەکرێ ئەم مانۆڕانە بەڕێوە دەبات، بەڵام حیزب و ڕێکخراوی خەڵکی کە لە دەرەوەی دەسەڵاتن، پشت بە ئاپۆرای خەڵک و بە هەزینەیەکی کەمی مادی و بەبێ هیچ زەرەر گەیاندنێکی ژینگەیی بە شێوەیەکی مەدەنیانە و بە چوارچێوەیەکی مانۆڕیدا چالاکی بە دژی سیاسەتی تۆقاندن و برسی کردنی خەڵک چالاکی دەکەن. نموونەی هەرە بەرچاو و کاریگەری ئەم شێوازە چالاکی و مانۆرانە لە ڕۆژهەڵاتی کوردستاندا، مانگرتنی سەرتاسەری ناوچە کوردستانیەکانی ڕۆژهەڵاتی کوردستان لە ۲۱ی خەرمانان دا کە بە مەبەستی شەرمەزارکردنی هێرشی مووشەکی بۆ سەر بنکە و بارەگاکانی حیزبی دێموکرات بوو و مانۆڕی دووەمیش لە۱٦/۷/۱۳۹۷دا بوو کە بۆ ناڕەزایەتی لە هەمبەر گرانبوونی کەلوپەڵی پێویستی ژیان و لە بنەڕەتدا نەخێرێکی بە هێزیش بوو بە سیاسەتە چەوتەکانی کۆماری ئیسلامی بەڕێوە چوون، ئەمەش لە کاتێکدا بوو کە مانگرتنی۱٦ی ۷ هاوکات بوو لەگەڵ مانۆڕی سەربازی کۆماری ئیسلامی ئێران لە زۆربەی ناوچەکانی ڕۆژهەڵاتی کوردستان، ئەمەش جارێکی دیکە نیشان دەدات کە ترس و خۆفی ڕێژیم لە خەڵکی کورد زۆرترە تا لە ناوچەکانی دیکەی ئێران، چونکە هاوکات لە گەڵ ڕۆژهەڵاتی کوردستان لە زۆربەی شارەکانی ئێران دا مانگرتن هەبوو، کەوایە مانۆڕی خەڵک کاریگەری زۆرترە لە مانۆڕی ترس و تۆقاندنی دەسەڵاتدارانی خۆسەپێن.
 
 
 
نووسین: ئەفشار گێچەیی

photo 2018 10 11 23 14 35

 
 
بەردەوام لە وڵاتی ئێراندا بابەتگەلێکی گرینگ دێنە بەرباس کە بە پێچەوانەی لێدوان و هەڵوێستی کاربەدەستان لەسەرەتای بابەتەکان و لە کۆتاییدا بڕیار و هەڵوێستیان دەگۆردرێ و هەردەم شانازی بەو هەڵگەڕانەوەیە دەکەن و بە زیرەکی و تاکتیک ناوی دەبن. یەکێک لەو بابەتانە کە دەسەڵات بە ڕواڵەت دژایەتی دەکات بەڵام بەکردەوە ملکەجی بووە، دانوستان لە گەڵ ئەمریکایە بە پێی ئەو خاڵانەی کە ئەمریکا دیاریکردووە.
 
پێشتر کەسانی شارەزا لە بواری سیاسەتی ئێران باسیان لەوە کردووە کە ئێران لە کۆتاییدا خۆی بەدەستەوە دەدات و ملڕاکێشێ خواستەکانی ئامریکا دەبێت. هەر بە پێی ئەو شتەی چاوەڕوان دەکرا، دەولەتیش بەردەوام لە هەوڵی ئەوەدا بووە ڕێگا خۆش بکات و پەیامەکەی خۆی بە گوێی ئەمریکادا بچرپێنێت.
 
سەرەڕای ئەوەی کە قەڵەم بە دەستانی حکوومەت قسەکانی روحانییان لە ڕێکخراوی نەتەوە یەکگرتووەکان بە زیرەکانە و بە نیشاندەری هەیبەتی ئێران دەزانن، بەڵام هەر لە قسەکانی روحانیدا سەردانەواندنێکی ئاشکرای پێوە دیار بوو کە بەردەوام لە ڕستەکانیدا لە وشەی دانوستان کەڵکی وەردەگرت و باسی شێوازی دانوستانی دەکرد و بە خوازراو یا نەخوازراو پشتی پەردەی نیشان دەدا.
 
ئەو قسانەی کە ڕژیم بۆ خەڵکی ئێرانی دەکات لەگەڵ ئەو قسانەی کە لە دەرەوەی ئیران دەکرێ جیاوازییەکی زۆریان پێوە دیارە، خامنەیی باس لەوە دەکات کە بە هێچ شێوەیەک دانوستان لەگەڵ ئەمریکا ناکرێ بەڵام لە ترسی لەناوچوونی دەسەڵاتەکەی ڕێگای بە سەرۆککۆمار داوە کە گۆڕەپانەکە خۆش بکات بۆ دانوستان و ملڕاکێشان، هەروەک لە ڕابردووشدا بۆ مانەوەیان تامی جامی ژەهراوییان کردووە.
 
یەکێکی‌تر لەو بابەتانە کە لەم دواییانەدا نیشاندەری سەردانەواندنی زیاتری ڕژیمی ئێران لە بەرانبەر ئەمریکادایە، بابەتی پەیوەست بوون بە کۆنوانسیۆنی نێودەوڵەتی بەرەنگاری ماڵیی ترۆریزمە (CFT) کە لە ڕووی ناچارییەوە بوو، تا ناوی ئەم وڵاتە لە ڕێزی ئەو وڵاتانەی کە ناویان لە لیستی ڕەشی FATFدایە بێتە دەرەوە، ئەمە لە حالێکدا بوو کە خامنەیی پێشتر وتبووی ئێمە پەیوەست نابین بەو کۆنواسیۆنە.
 
مەحەممەد جەواد زەریف وەزیری دەرەوەی ئێران، لەو قسانەی کە لە پارلمانی ئەو وڵاتە کردی، ڕاشکاوانە باسی ئەوە دەکات کە ئەگەر خاڵەکانی ئەمریکا جێبەجێ نەکرێت زۆر بە زیانیان تەواو دەبێ.
زەریف سەبارەت بەو باسە دەڵێت: "نە من نە سەرۆککۆمار ناتوانین بەڵێنی ئەوە بدەین کە بە پەیوەست بوون بە CFT کێشەکانمان چارەسەر دەکات، بەڵام دەتوانین دڵنیاتان بکەینەوە کە پەیوەست نەبوون بەو کۆنوانسیۆنەوە کێشەکانمان زۆر دەکات و بەهانە دەکەوێتە دەستی ئەمریکا".
 
دە رۆژ بەر لە تەواو بوونی کاتی دیاریکراو بۆ پەیوەست بوونی ئێران بە کۆنوانسیۆنەکەوە، ئێران لە کۆتاییدا پەیماننامەکەی پەسەند کرد و ئێستا لە لیستی ڕەشەوە دەربازی لیستی خۆڵەمێشی بووە. دەسەڵاتدارانی ئێران کە پێشتر باسیان لە بەرەنگاری لەگەڵ ئەمریکادا دەکرد و درۆشمی مەرگ بۆ ئامریکایان دەوتەوە، ئێستا خەریکن ئەو خاڵانە کە بەهانە دەداتە دەستی ئەمریکا چارەسەر دەکەن و کەم کەم ملراکێشی خواستەکانی ئەمریکا و خواردنی گۆزەیەک ژەهری تاڵتر لە جامی پێشوو دەبن.
 
بەڵام زانا سیاسییەکان زۆربەیان هاوڕان لە سەر ئەوەی کە پەسەندکردنی ئەو خاڵانەی کە ئەمریکا دیاری کردووە، وەکوو مەرجەکانی دانوستان بۆ گۆڕینی ڕەفتاری ئێران بە کردەوە ناکرێ، چۆنکە لە ئەگەری پەسەند کردنی ئەم مەرجانە لە لایەن ئێرانەوە شتێک بە ناوی ڕژیمی کۆماری ئێسلامیی ئێران نامێنێت، ئەم خاڵانەی دیاری کراوان لەگەڵ ئامانجە بنەڕەتییەکانی شۆڕش بە تایبەتی هەناردەکردنی شۆرش بۆ دەرەوەی سنوورەکانی ئێران دژایەتییان هەیە کە ڕژیم بە سەرەکیترین ئامانجی خۆی دەزانێت.
 
بە دیتنی ئەم هەوڵانەی ئێران و ئەو گوشارانەی ئەمریکا وا دەردەکەوێ کە کاربەدەستانی ئێران بە دوای رێگایەکی سێهەمدا دەگەڕن بۆ چارەسەری کیشەکانیان.
 
 
عومەر فەخرەدین‌فەر