هەواڵی سیاسی

\photo 2019 01 31 22 45 06

 

 
 
 
سێ مانگ دوای شۆڕشی گەلانی ئێران لە ٢ی بانەمەر حکوومەتی کۆماری ئیسلامی ئێران بە هۆی ئاڵۆزی لە نێو هێزەکانی ئەرتەش و نەبوونی متمانە و باوەڕمەندی پێویست لە نێوان ئەرتەش و حکوومەتی نوێ ڕوحوەللە خومەینی بۆ جێبەجێکردنی ئامانجەکانی نیزام و پاراستنی دەسەڵاتی خۆی لە بەرانبەر هێرشی دەرەکی، شۆڕشی نێوخۆیی،کودتا و لەنێوبردنی لایەنە سیاسیەکان و سەرکووتی دژبەران و…هتد
بڕیاری پێکهێنانی هێزێکی فەرمانبەر بە ناوی سوپای پاسداران درا و دواتر سوپای پاسادارانی لە ناو یاسای بنەرەتی گونجێندرا.
 
سوپای پاسداران لە شەڕی هەشت ساڵەی ئێران و عێراق ڕۆڵێکی گرینگی و بەرچاوی هەبوو توانیی بەرنامە و پلانەکانی حکوومەت بێ ئەملا و ئەولا جێبەجێ بکات.
 
چەند ئەرکی سەرەکی سوپا لە سەرەتای دامەزرانی:
١-بە هەموو تواناوە لە بەرانبەر هێزە هێرشکەرەکان شەڕ بکات و سنوورەکانی ئێران بپارێزن.
 
٢- پەرەپێدان بە ئایینی ئیسڵام و بەتایبەتی مەزهەبی شیعەگەرایی لە نێو کۆمەڵانی خەڵک و پێشگیری و سەرکووتی ڕۆشنبیران و دێموکراسی لە کۆمەڵگا دا.
 
٣-دامەزراندنی زیندانی شاراوە، ڕێکخراوی سیخوڕیی، سازمانی بەسیج و سەرکووتی خەڵکی شۆڕشگێر و ڕزگاریخوازی نێو کۆمەڵگا و لە نێوبردنی لایەنە سیاسی و کۆمەڵایەتییەکانی جیاواز لە خۆیان.
 
٤-بەکەڵک وەرگرتن لە بیروباوەری کۆمەڵگای تۆخی ئیسلامی خەڵک بۆ لای خۆیان ڕابکێشن بۆ وێنە لە شەڕی هەشت ساڵە بە فریودانی کۆمەڵانی خەڵکی نەخوێندەوار وهەست ورووژاو بە ئایین و مەزهەب توانیان بە کۆکردنەوەی هێز و بەڕێکردنیان بۆ مەیدانی شەڕ خەڵکانێکی زۆر بە نێوی ئیسلام و ئایین بۆ سیاسەتێکی پاوانخوازانە بە کووشت بدەن.
 
دوای کۆتایی هاتنی شەڕی هەشت ساڵە، سوپای پاسداران وەکوو ئەرتەش دەرەجە و پلەبەندی دەکرێ و کەمووکۆڕییەکانی چارەسەر و گرینگییەکی زۆرتری پێدەدرێ، پاش تێپەڕ بوونی ماوەیەک پایەبەرزەکانی سوپای پاسداران چاویان لە دەسکەوت و داهاتی زۆرترە، بەڵام ئابووری ئێران لاوازە و وڵامدەری ئەو داخوازییانە نین بۆیە حکوومەت بۆ بێدەنگکردنی سوپای پاسداران دەسەڵاتێکی زیاتری بە فەرماندە پایە بەرزەکانی سوپا سپارد، ئەم جارە سوپا لە باری نیزامی و ئەمنییەتی سەرتر دەڕوا و بە پشتگیری ڕاستەوخۆیی عەلی خامنەیی دەست دەخاتە نێو کاروباری سیاسەت.
 
بە بەهێزتر بوونی سوپای پاسداران لە باری نیزامی، سیاسی و هەروەها لە باری ئابووریی ئەمجارە بە بڕیاری حکوومەت دەستدەکات بە پشتیوانی لە هێز و لایەنە ئیسلامییە دەرەکییەکان لە وڵاتانی دراوسێی وەکوو عێراق، سوریە، لوبنان، یەمەن، فلستین، ئەفغانستان و …هتد، بۆ پەرەپێدان بە دەسەڵات و بەرژەوەندییەکانی و، تەنانەت زۆرجار بە شێوەی ڕاستەوخۆ و ناڕاستەوخۆ لە سیاستی ئەو وڵاتانەش بە قازانجی خۆی دەستێوەرداندەکات.
 
دواتر سوپای پاسداران بە شێوەکانی جۆراوجۆر هەوڵدەدات تا لە بواری ئابووریی خۆی بەهێزتر لە جاران بکات بۆ وێنە:
-گرێبەستەکانی چەند ملیارد دۆلاری سوپا لە بواری نەوت و گاز لەگەڵ وڵاتەکانی تر.
 
-قاچاخی کەلوپەل وماشێن و… هتد لە ئیسکلە دامەزراوەکانی خۆی و سنوورەکان.
 
-ترانزیتی ماددەی هۆشبەر و فرۆش و بڵاوکردنی ،کە بەشێک لەم ماددە هۆشبەرە لە سەرانسەری وڵاتی ئێران بۆ قازانجی چەند لایەنە کە لەم بوارەوە چەنگی دەکەوێت.
-لە ئەستۆ گرتنی بەشێکی زۆر لە ساخت و سازی وڵات وەکوو پڕۆژە گەورەکانی بەنداو سازکردن، ڕێگاوبان و مێترۆ و…هتد
 
-بەشی راکێشانی لولەی نەوت و گاز، پاڵاوتنگاکان …هتد
 
-دامەزراندنی کارگەی چەک و چۆڵسازکردن، بەشداری لە گۆڕەپانی هەوا فەزا، فرۆکەخانەکان، بەشی پێوەندییەکان و دامەزرەوەکانی تر.
 
-بەشداری لە سیستەمی بانکی و بوورس و دەستێوەردان لە ئەرز و زێڕی ئێران.
 
-خستنە بن دەستی بەشی گومرگ، باج، هاتوچۆ.
 
-تاڵانکردنی بەشێکی زۆر لە شوێنەوارە مێژووییەکان، کانگا سرووشتیەکان و…هتد
 
تەنیا بەشێک لە دەسکەوتە ئابوورییەکانی سوپایە و لە دەیان بەشی دیکە بە دەیان ملیارد دۆلار لە سەرمایەیی خەڵکی ئێرانیان تاڵانکردووە و لە بەرانبەرداهیچ خزمەت و قازانجیان بۆ پێشکەوتن وباشتر کردنی بژێوی خەڵک نەکردووە و بەردەوام داهات و سەرمایەی وڵاتیان بۆ بڵاوکردنەوەی ترۆریزم و دەسەڵاتی خۆیان لە ناوچەکە بە کار هێناوە.
تەنانەت لە بەشی نیزامی و ئەمنییەتیش لایەنگری دەنگی خەڵک نەبوون و بە کووشتن ،چەوساندنەوە و خوێنرێژی بە ناحەق و دوور لە مڕۆڤایەتی خیانەتی هەرە گەورەیان بە خەڵک و وڵاتی خۆیان کردووە.
 
سوپای پاسداران بە پشتگیری ڕاستەوخۆ لە لایەن عەلی خامنەیی و کەسایەتییەکانی بەرزی حکوومەت لە ژێر ناوی پارێزگاری لە سەرمایە، خاک و خەڵکی وڵات بە پێچەوانە بە تەواوەتی تەوانەوە سەرمایە و بەرژەوەندی خەڵکی ئێرانیان لە نێو بردووە، لە داهاتووشدا بە شێوەی گەورەتر و بەرفراوانتر ئەم کارە دووپات دەکەنەوە بۆیە خەڵکی ئێران دەبێ بە زووترین کات پێش لەو باندە بگرێت بە تایبەتی لاوانی تازە پێگەیشتووی ئێران و بە تایبەتیتر نەتەوەی کورد دەبێ بە هەموو تواناوە پێش لە پەرەستاندنی سوپ پاسداران و سازمانەکانی ژێر دەسەڵاتی وەکوو بەسیج بگرن.
 
لێرە بە شیکاریەکی سەرەتایی بۆمان ڕووندەبێتەوە کە سوپای پاسداران تەنیا هێزێکی نیزامی و ئەمنییەتی نییە و بە دەستێوەردان بە شێوەی بەربڵاو لە بەشەکانی دیکە کە هیچ پێوەندییەکیان بە هێزێکی نیزامی نییە گەورەترین لێکەوتەی بۆ خەڵکی ئێران بەدواوە بووە.
 
 
نووسین : ئازاد گوڵستانی
 
ئەم بابەتە بیر و ڕای نووسەرە و هیچ پێوەندی بە ماڵپەڕەوە نییە
 
 

photo 2019 01 24 19 02 30

 

 
لە جیهانی ئەمرۆدا خەبات کردن بۆ گەیشتن یان ستاندنی مافی یەکسانی وەکوو ئەرکێکی سەرشانی ماف زەوتکراوان وایە، کە لە درووشمی حەفتایەمین ساڵڕۆژی جیهانی مافی مرۆڤ پێداگری لەسەر خەباتکردن بۆ یەکسانی کراوە. 
لاوانی کورد هەردەم خۆیان فیدای بەرز ڕاگرتنی هێما و ڕەمزە نەتەوایەتییەکان و گەیشتن بە یەکسانی و مافە ڕەواکانی نەتەوەکەیان کردووە و بونەتە وزەی دەیان ڕاپەڕین و شۆڕش لە مێژووی ئەم گەلە بە ئاوات نەگەیشتووە.
 
دوژمنانی کورد بەردەوام هەوڵیانداوە کە پیرۆزییەکانی نەتەوەکەمان بێ بایەخ بکەن و لە جێگەو پیگەی بەرزیان کەم بکەنەوە بەڵام هێزی چاو کراوە و هەمیشە لە گۆڕەپانی لاو ئەم هەوڵ و پلانانەی دوژمنی پووچەڵ کردۆتەوە و ئەم گەورەیی و بەرزیەی دە هێندە بەرزتر کردۆتەوە ،ئەو توێژەی کە ئامانج و بیری نەتەوەیی کوردی لە هەر چوار پارچەی کوردستان پاراستووە و گەشەی پێداوە و بۆتە هۆکارێک کە پەرە بستێنێ و دوژمنانی نەتەوەکەمان وەکوو ترسێکی ڕۆژانە بۆ سەر دەسەڵاتیان چ لە ڕابردوو چ لەئێستا و داهاتووشدا لێی دەڕوانن توێژی لاوی کۆمەڵگای کوردستانن.
 
نەیارانی ئەم نەتەوە بندەستە بەدرێژایی مێژوو بەردەوام بە کەڵک وەرگرتن لە دەیان شێوەی جۆراوجۆری وەکوو هەڵخەڵەتاندن بەناوی دین و مەزهەب و ماددەی هۆشبەر و پلانی بەرنامە داڕێژراوی درێژ ماوە هەوڵیان داوە، ئەم وزە و بیر و هێزە کاریگەرە لەناو ببەن یان بیخەنە ژێر چاوەدێری و هەژمونی خۆیان کە بەدڵخۆشییەوە هەمیشە کەسانێکی زانا و تێگەیشتوو هەبوون و هەن کە ئەم پلانە قێزەونانەی دوژمن ئاشکرا بکەن و پێش بە سەرکەوتنی پیلانەکانی دژبەرانەی نەتەوە بگرن.
 
لەو وڵاتانەی کە کوردستانی گەورەی تێدا دابەشکراوە، سەرەڕای ئەوەی کە لە ناوچە کوردستانیەکان چەند هێندەی ناوچەکانی تر فەزای ئەمنی و میلیتاریزەیان پێکهێناوە ،بەڵام خستنە ژێر چاوەدێری و زەخت و گوشار هێنان نەیتوانیوە ببێتە هۆی لاواز کردنی خەبات و ئەم شۆڕشکردنی دژ بە داگیرکەر سڕ بکات یان پێشی پێ بگریت. 
 
لاوان ڕۆڵ و دەوری کردەوەیی خباتیان لە ئەستۆیەو وەئەستۆیان گرتووە و ئەمەیان بە خوێن و بوونیان لە ڕیزەکانی خەبات سەلماندووە و بەردەوام لەسەرجەم شێوەکانی خەبات کردن بەدژی داگیر کەردا لەدەستپێشخەران و چەخماخە لێدەرانی هەر چەشنە بەرەنگار بوونەوە و هەڵوێست گرتنێک بەدژی زوڵمی زاڵمان بوو. 
 
بەڵام ئەوەی کە لەهەموو ئەم زەختوو هەڕەشە و ناڕەواییەی بەرامبەر بە لاوانی نەتەوەکەمان بە کەڵک وەرگرتن لە سەرجەم بوارەکانی تێکنۆلۆژی سیخوڕی و هێزی ترسو و تۆقاندن و هەزاران پلان و پڕۆگرامی دیکە کە دەسەڵات داران و داگیر کەرانی خاکی کوردستان هەیانە گرینگترە ئەوەیە کە بۆ نەیانتوانیوە ئەم خەباتە لەناو بەرن یان بە تەواوی سەرکوتی بکەن.
 
یەکێک لەو هۆکارانە کە بەردەوام لە لایەن حیزبەکان و ئازادی خوازان باسی لێوە دەکرێت ڕەوایی ئەم خەباتەیە کە بەسەر کۆی گشتی ئەم ترس و لێکەوتانەی خەبات کردندا زاڵ دەبێ و هاندەری زۆرینەی خەڵکە بۆ خەباتکردن بۆ گەیشتن بە مافەکانیان. 
 
بەڵام ئەوە کە دەبێتە بەشێکی هەرە گەورە لەم خەباتە ڕەوایە هەوڵ دانە بۆ یەکسانی مرۆڤێک لە بەرامبەر مرۆڤێکی دیکەدا سەڕەڕای هەر چەشنە جیاوازی ڕەنگی ، ئاینی ، زمانی ، و... .
ئەم پرسە پەنابردنی لاوان بۆ شۆرش و لە ڕێگەی خەباتکردن هەوڵدان بۆ لەناو بردنی ئەو نایەکسانییەی چەند هێندە کردوە وە ڕەوتی داخوازیەکانی لە گۆڕەپانێکی گەورە بۆ گۆڕەپانێکی گەورەتر گواستۆتەوە. 
 
کاتێک لاوێکی کورد لەلایەن دەسەڵتەوە وەکوو لاوێکی کورد گرینگی پێنادرێت سەڕەڕای هەر چەشنە لێهاتوویی و پسپۆڕییەک و دژایەتی بێناسین و بێ لێکەوتە لەگەڵی دێتە مەیدان بەتایبەتی لە وڵاتێکی وەکوو ئێران چەند لایەنی دژایەتی بەرامبەر بە تاکی کورد تەنیا بە ناساندنی تاک وەکوو کوردێک لەلایەن نەتەوەی دەسەڵات دار پێک دیت لایەنی ئایینی ، لایەنی غەیرە فارس وە لایەنی شارستانی کە ئەمانە لە جەوهەرەی خۆیاندا لە نایەکسانی مرۆڤ لە بەرامبەر مرۆڤدا و خۆ بە باڵا دەست زانینی پان ئیرانیستەکان واتایەکی دیکە ناگەیێنێت. 
 
تێگەیشتنی هەڵەی حاکمان و بە ڕوانگەی دوژمن لێکدانەوەکانیان بە بێ گوێبیست بوونی جەوهەرەی داخوازیەکانی نەتەوەی کورد بۆتە هۆی پەیدابوونی درزێک لە نێوان نەتەوەی کورد و وڵاتانی داگیر کەری نیشتمان کە زۆربەیان بە ڕوانگەیەکی جیایی خوازی و ئاژاوە گێڕانە دەڕواننە خەباتی نەتەوەی کورد لەکاتێکدا خەباتی نەتەوەکەمان لەگەڵ پێوەرە جیهانییەکان و ئەو مافانەی بۆ سەرجەم نەتەوەکان بەڕەوا زانراوە هیچ جیاوازییەکیان نییە و لە یەکەمینیشیان وەدەست هێنانی مافی یەکسانیە کە وەکوو مافێکی ڕەوا بەردەوام هەوڵی بۆ دراوەو دەدرێت تا گەیشتن بەم یەکسانیە ، تا ئەم شێوازە بیرکردنەوەیە لە لایەن ئەم نەتەوانە زاڵ بێت ئەم خەباتە لەلایەن لاوان و درێژە دەرانی خەباتی یەکسانی بێ پسانەوە بوونی دەبێت .
 
ئەوەی کە جێگای سەرنجە و بۆ دژبەرانی نەتەوەی کوردیش سەلمێندراوە ئەوەیە کە ساڵانێکی
 
دوور و درێژە کە نەتەوەی کورد خەبات دەکات بۆ وەدەست هێنانی یەکسانی و ئامانج و پیرۆزییەکانی ، ئەگەرچی تا ئێستاش نەیتوانیبێت بەسەرجەم ئامانجەکانی بگات بەڵام هەرگیز وازی لە ئامانجەکانی نەهێناوە وە ئەو نایەکسانیەی قەبووڵ نەکردوە وە لەئێستاشدا هەر لەسەر ئەم ڕێبازە بەردەوامە لە خەبات. 
 
ئاڵا بەدەستانی خەباتی یەکسانی خوازی نەتەوەکەمان 
لە ڕابردوو و ئێستاو داهاتووشدا لاوانی چاو نەترس و گیان لەسەر دەستی نەتەوەی کوردن کە دەکرێ وەکوو نمونەیەک لە کۆڵنەدان و خەبات بۆ بەدەست هێنانی مافی یەکسانی ببنە سەرمەشق و سەمبوول بۆ باقی لاوان و نەتەوەکانی دیکەی جیهان . 
 
 
نووسین :عومەر فەخرەدین فەر
 

IMG 20181013 170329 289

 
 
هێما و دەسکەوتە بەنرخەکانی نەتەوەکەمان لە ڕابردوو ئێستاشدا چ لە کوردستان و چ لە دەرەوەی کوردستان جێگای پێزانین و شانازییە، بۆ هەموو کوردێک کە خاوەنی مێژوویەکی زێڕین و پڕ دەسکەوتە و دەرەنجامی لە خۆبردوویی ڕێبەران و قارەمانانی گەلەکەمانن، کە بە جیهانی سەلماندووە هیچ کاتێک، هیچ دەسەڵاتێک و دوژمنێک نەیتوانیوە و ناتوانێ پێش لەو بیرە ڕزگاریخوازانە و دێموکراسیخوازانەی گەلەکەمان بگرێت، بە سەرکووت و چەوساندنەوە هەرگیز نەیانتوانیوە زمان و کلتووری چەند هەزار ساڵەی ئێمە لە نێو بەرن و نەتەوەکەمان هەرگیز ڕێگای بەم کارە نەداوە و نایدا.
 
یەکێک لەو دەسکەوتە گرینگانە کە باندۆرییەکی یەکجار زۆری هەبووە لە سەر رەوتی خەبات بۆ وەدەستهێنانی مافە رەواکانی گەلەکەمان لە سەردەمی نوێی جوولانەوەی گەلی کورد کۆماری کوردستانە بە رێبەرایەتی حیزبی دێموکرات و لە سەر دەستی پێشەوا قازی محەممەد و بە بەشداریی کۆمەڵێک روناکبییران لە رۆژهەڵاتی کوردستاندایە.
 
بە هەڵوەشاندنەوەی کۆمەڵەی ژێکاف و دامەزراندنی حیزبی دێموکرات واتا یەکەم حیزبی مۆدێرن و خاوەن بەرنامە و پرۆگرامی گوونجاو لە کوردستان و خاوەن رێکخستنی کۆمەڵانی خەڵک لە هەموو چین وتوێژەکانی کۆمەڵگا بە باشترین شێوە بۆ گەیشتن بە مافە رەواکانی گەل هەوڵیداوە و رەوتی خەباتی ڕزگاریخوازانەی گەلی کوردی بەرەو قۆناغێکی نوێ و پێشکەوتوو لە ئاستی جیهان برد.
 
خەڵکی شۆڕشگێری مەهاباد بە چەک کردنی شارەوانی شاری مەهاباد و ڕێکخستنی کۆمەڵانی خەڵکی مەهاباد لەلایەن حیزبی دێموکراتەوە ئەم حیزبە توانی سوپای نەتەوەی پێکبێنێ و دواتر بە هەڵسەنگاندنی بارودۆخی مەوجود لە ڕۆژی ۲ی ڕێبەندانی ١٣٢٤ هەتاویی لە مەیدانی چوارچرای شاری مەهاباد بە بەشداری نزیک بە ٢٠ هەزار کەس لە چین و توێژەکانی خەڵکی مەهاباد، ڕووناکبیران لە سەرانسەری کوردستان و ئەندامان و لایەنگرانی حیزب و ئەندامانی ڕێبەرایەتی حیزب و ژنراڵ مستەفا بارزانی و پێشەوا کۆماری کوردستان بە سەرۆک کۆماری "قازی مەحەمەد" ڕابگەیێنێ و لەو ڕۆژەدا قازی محەممەد سوێندی یاسایی خوارد کە تا دواهەناسەی ژیانی وەفادار بە خەڵک و کۆمار بێت.
 
بەرەبەرە کۆماری کوردستان لە ڕۆژهەڵاتی کوردستان گەشەی کرد و ڕۆژ لە دوای ڕۆژ بەرفراوانتر بوو. حیزبی دێموکراتی کوردستان بە هەموو توانایەوە بۆ بەرەو پێشبردنی بەرنامەکانی خۆی هەوڵیدە دا و هاوکات لەگەڵ بزووتنەوەی گەلی ئازەری لە ئازەربایجان ، حیزبی هیوا لە کوردستانی باشوور و یەکیەتی سۆڤیەت لە پێوەندیدا بوو و توانیبووی پێوەندییەکی پتەو و قایم درووست بکا.
 
ئەو کۆمارە سەربەخۆیە لەگەڵ ئەوەی ئامانجی درووستکردنی قەوارەیەکی سەربەخۆ بوو بۆ کورد بە گشتی هەوڵێکیش بوو بۆ گۆرینی کۆمەڵێک نەریتی دواکەوتوو و دانانی بناغەیەکی کولتووری تەندرووست بۆ درووستبوونی دەوڵەتێکی نەتەوەیی.
کۆماری کوردستان نموونەیەکی بەرز لە دێموکراسی و دادپەروەری کۆمەڵایەتی پێشکەوتوو بوو، کە لە دڵی دەوڵەتە دیکتاتۆر و فاشیستەکان و کۆمەڵگایەکی نەخوێندەوار و دواکەوتوو سەریهەڵدا و سەرەرای ئەو تەمەنە کورتەی یەکێک لە دێموکراتترین و ئاشتیخوازترین حکوومەتی کاتی خۆی بوو.
 
چەند دەسکەوتی گرینگ لە خزمەتەکانی حیزبی دێموکرات و کۆماری کوردستان برییتی بوون لە:
 
١- دامەزراندنی یەکیەتیی لاوان و ژنان کە لەو ڕێگەیە توانیان ژنان و لاوان بەشدار بکەن لە کاروباری نێو حکوومەت و کۆمەڵ و هەنگاوێک بۆ یەکسانی ژن و پیاو و پێکهێنانی کۆمەڵگایەکی کراوەتر هەڵگرن.
 
٢- زمانی کوردی دەکرێتە زمانی فەرمی، هەروەها داڕشتنی بەرنامەیەکی پتەو بۆ پاراستن و پەرەپێدانی کولتووری کوردەواری.
 
٣-دانانی سروودی نەتەوەیی، ئاڵا، سوپای نەتەوەی کوردستان. 
 
٤-گرینگیدان بە خوێندەواری و خوێندن بە زمانی کوردی و پشتیوانی لە خوێندکاران بۆ بردنە سەرەوەی زانست و زانیاری کۆمەڵگا.
 
٥- دانانی چاپخانەی کوردی و چاپی کتێب ، گۆڤار و ڕۆژنامەی کوردی.
 
٦-هەڵبژاردنی ناوی پیرۆزی پێشمەرگە بۆ هێزی نەتەوەی کە ئەمڕۆ ئەو ناوە لە ئاستی جیهانی بە فەرمی ناسراوە و قارەمانێتی و ئازایەتی ئەم هێزە بۆ جیهان
سەلمێندراوە و بۆتە هۆی سەربەرزی گەلی کورد لە نێو جیهاندا.
 
بە دەیان خالی ئەرێنی دیکەش هەن کە سەرچاوەی ئیلهام وەرگرتنیان کۆماری کوردستانە.
 
لە ئێستاشدا ڕۆلەکانی نەتەوەی کورد بۆ بەدیهێنانی ئاوات و ئارمانجەکانی کۆمار و دەستەبەرکردنی مافی یەکسانی و مافی چارەی خۆنووسین شۆڕشگێرانە خەریکی خەبات کردن و نرخدان بۆ دەستەبەرکردنیانن.
 
نووسین:ئازاد گوڵستانی

photo 2019 01 04 00 47 29

 
 لاوان میدیا : دۆناڵد تڕەمپ لە وتووێژێکی خۆی دا لەگەڵ میدیا جیهانییەکان ڕایگەیاند، کە ئێمە دڵخۆش نین بە فڕۆشتنی نەوتی کوردەکان بە ئێران.
 
سەرکۆماری ئەمریکا ڕۆژی ١٢ی بەفرانبار، وێڕای ئەوەی لە دیاریکردنی کات بۆ چوونەدەرەوەی هێزەکانی لە سووریا خۆی بوارد، لە هەمان کاتدا ناڕەزایەتی خۆی سەبارەت بە فرۆشتنی نەوت لەلایەن کوردەکان بە ئێران دەربڕی.
 
ئەو لێداوانە نوێیانەی تڕامپ دوای ئەوە دێت کە بڕیاری ترامپ بۆ کشانەوە لە سووریا ناڕەزایەتی زۆری بەدواوە بووە و زۆرێک لە وڵاتان دژی چوونەدەرەوەی ئەمریکان لە سووریا. 
 
دۆناڵد ترامپ وێڕای ئەوەی باسی لە کشانەوەی هێزەکانی لە ماوەیەکی زەمەنی دیاریکراودا کرد، جەختی لەسەر ئەوە کردەوە پشتگیری کوردەکان دەکات، کە لە شەڕی دژی داعش هاوکاری هاوپەیمانان بە ڕێبەرایەتی ئەمریکایان کردووە، ئەوەشی ڕاگەیاند کە ئێمە کوردەکان دەپارێزین، بەڵام چی دی پێویست ناکات لە سووریا دابمێنینەوە .
 
 

photo 2018 12 27 19 17 43

 

 
لاوان میدیا: سەرکۆماری ئەمریکا دۆناڵد تڕەمپ لە سەفەرێکی ڕانەگەیەندراوی خۆی دا بۆ عێراق ڕایگەیاند، "کە ئێمە سەربازەکانمان لە عێراق ناکشێنینەوە دواوە، ڕێگری لە هەر جۆرە جموجۆڵێکی داعش دەگرین لە عێراق و سووریا، هەروەها ئەوەی ڕاگەیاند کە چاودێری چالاکییەکانی ئێران دەکەین".
 
دۆناڵد تڕەمپ لە سەفەرە لەناکاوەکەی بۆ عێراق ئەوەشی ڕاگەیاندووە کە " هێزەکانی ئەمریکا زۆر بەهێزانە و، ڕێکوپێک لە سووریا دەکشێنەوە دواوە" ئەوەشی ڕاگەیاندووە، کە چاودێری جموجۆڵەکانی داعش و پاسدارەکانی ڕێژیمی ئێران دەکەن.
 
سەبارەت بە کشانەوەی لە سووریا ئەوەشی ڕاگەیاند کە " ئێمە لە سەرەتاوە ئەوەمان ڕاگەیاندووە کە هێزەکانی ئێمە لە سووریا تەنها ئامانجیان کۆنتڕۆڵکردنی ناوچەکانی ژێر دەستی داعش بووە".
 
بۆ دووبارە ئاوەدان کردنەوەی ناوچە خاپوورکراوەکان، کە لەژێر دەستی داعش دەرهێندراون دۆناڵد تڕەمپ گووتی : ئەمریکا کاری دروستکردنەوەی دەوڵەتەکان نییە، بەڵکوو ئەوە کاری وڵاتە دەوڵەمەندەکانی ناوچەیە".
 
جێی ئاماژەیە کە ئەم سەفەرەی دۆناڵد تڕەمپ لەکاتێک دایە بۆ عێراق، کە کۆشکی سپی و کۆنگرێسی ئەمریکا لەسەر دروستکردنی دیواری کۆنکرێتی ناکۆکن، بەم هۆیەشەوە چەندین بەش لە دەوڵەتی ئەمریکا داخراون وکارمەندەکانی ناڕۆنەوە سەرکارەکانیان.