29383
 
لاوان  میدیا: ئەندامێکی یەکیەتیی لاوانی دێموکراتی کوردستانی ئێران لە شاری بۆکان بە هۆی ڕووداوی هاتوچۆ گیانی لە دەست دا.
 
 ڕۆژی سێشەممە ڕێكەوتی ١ی گەلاوێژ "سامڕەند كاكلی" لەدایکبووی ساڵی ١٣٦٨ی هەتاوی، كوڕی خالید خەڵكی شاری بۆكان بە هۆی ڕووداوی هاتوچۆ لە ڕێگای نێوان بۆكان  ـ مەهاباد كۆچی دوایی كرد.
 
ناوبراو لە هەر سەرەتای لاویەتیدا بە هەست‌كردن بە زوڵم و ستەمی ڕێژیمی ئیسلامی ئێران پەیوەندی بە حیزبی دێموكراتی كوردستانی ئێرانەوە گرت و وەک ئەندامی نهێنی ئەو حیزبە لە شاری بۆكان، وەک ئەندامێكی چالاک كارەكانی بەڕێوە دەبرد و لەنێو كۆمەڵگە و بە تایبەت لاوان دا هەوڵی لەقاودانی سیاسەتەكانی ڕێژیمی دەدا.
 
هەروەها جگە لە ڕاپەڕاندنی ئەركە حیزبیەكانی، وەك ئەندامێكی نهێنی یەكیەتیی لاوانی دێموكراتی كوردستانی ئێرانیش چالاكی بەرچاوی ئەنجام دا و بە هەموو توانای هەوڵ دەدا هەتاكوو ناوی ئەو ڕێكخراوەیە لەنێو لاوانی كوردستاندا بە بەرزی ڕابگرێ.
 
بەداخەوە ڕۆژی سێشەممە كاتژمێر ١٠:٣٠ بەیانی لە ڕێگای نێوان بۆكان ـ مەهاباد ناسراو بە جاددەی بورهان بە ڕووداوی هاتوچۆ گیانی لە دەست دا. ئاواتەكانی كە ئازادیی كوردستان و ژیانێكی سەربەست لەژێر دەسەڵاتی كوردی دابوو بەچاو نەدیت.
 
یەکیەتیی لاوان وێڕای بەداخبوونی بۆ لە دەستدانی ئەو لاوە شۆڕشگێڕە، سەرەخۆشی لە بنەماڵە، خزم و کەسوکاری ناوبراو دەکات و خۆی بە شەریکی خەمیان دەزانێت.