IMG 20191216 205654 701

پەیامی کۆمیتەی هاوئاهەنگیی رێکخراوە دێموکراتیکەکانی کوردستانی ئێران بە بۆنەی ١٠‌ی خاکەلێوە رۆژی شەهیدانی کوردستان

بنەماڵەی سەربەرزی شەهیدان
خەڵکی خەباتکاری کوردستان
بزووتنەوەی نەتەوایەتیی کورد، یەکێک لەو بزووتنەوانەیە کە لە راستای دابینبوونی مافە نەتەوایەتییەکانی نەتەوەی کورد خاوەنی مێژوویەک لە قوربانیدان و گیانبازییە. کۆماری کوردستانیش یەکێکە لە ئەزموونە سەرکەوتووەکانی خەباتی نەتەوەیی کە لە پیناویدا دامەزرێنەری یەکەم دەسەڵاتی مۆدێڕنی کوردی و هاورێیانی گیانیان بەخت کرد. 
٧٣ ساڵ لەمەوپێش لە رۆژی ١٠ی خاکەلێوەی ١٣٢٦ی هەتاوی، پێشەوای نەمر قازی موحەممەد، ڕێبەری حیزبی دێموکراتی کوردستان و دامەزرێنەری کۆماری کوردستان، وێڕای ژنراڵ موحەممەد حوسەین خانی سەیفی قازی، وەزیری بەرگریی کۆمار و ئەبولقاسمی سەدری قازی، نوێنەری خەڵکی مەهاباد لە پارلەمانی ئێران لە مەیدانی چوارچرای شاری مەهاباد، لە لایەن ڕێژیمی پەهلەوییەوە لە سێدارە دران.
پاش زیاتر لە حەوت دەیە لە نەمانی ئەو ئەستیرە پرشنگدارەی ئاسمانی کوردایەتی، ئامانجەکانی هەروا ئامانجی هەرە بەرزی بزووتنەوەی كورد لە هەر چوار بەشەكەی كوردستاندان و لە میژوودا دەدرەوشێنەوە. 
پێشەوا کە بە گرینگیدان بە ژنان و لاوان لاپەڕەیەکی تازە و هزرێکی مۆدیڕنی لە مێژوودا تۆمار کرد، زۆر بە باشی لەوە تێگەیشتبوو کە لاو و شۆرش گرێدراوی یەکترن و ئەو دوو چەمکەش پێکەوە داینامۆی گۆرانکارییەکانن.
 سەرکوتکردنی جوڵانەوەی مافخوازانەی خەڵکی کوردستان بە نەمانی کۆماری کوردستان و لەسێدارەدانی پێشوا قازی محەممەد لەسەر دەستی رژیمی پەهەلەوی نەک هەر نەیتوانی بیری ئازدیخوازی لەنێو خەڵکی کوردستاندا لەناو ببات، بەڵکو لە داهاتوودا بەهێزتریش بوو و ڕووداوەکانی دواتر ڕەوایی ئامانجەکانی ئەو ڕێبەرە مەزنەیان سەلماند و ئامانجەکانی کۆماری کوردستان بوون بە ئیلهامبەخشی خەبات بۆ ئازادی و ڕزگاری نەتەوەی کورد لە سەرتاسەی ناوچەکەدا. تەنانەت ئەو هەموو سەرکوت و زەبروزەنگەش کە کۆماری ئیسلامی، لە ماوەی دەسەڵاتی ڕەشی خۆیدا بە دژی گەلی کورد بەکاری هێناوە، بە خەباتی یەکگرتووانەی سیاسی و مەدەنیی خەڵکی کوردستان وەڵامی توندی پی دراوەتەوە. 
۱۰ی خاكەلێوە لەگەڵ ئەوەی بۆ ئێمە وەبیرهێنانەوەی ڕۆژی شەهیدانی كوردستانە، لە لایەكی دیكەشەوە سەرچاوەی ئیلهام و ورە بەرزیمانە بۆ روحیەی خەباتگێڕانەمان و دووپاتی دەکەینەوە خەبات و قوربانیدان لە پێناوی ئامانجەكانی كۆمار رانەوەستاوە و ئاڵای تێكۆشانمان لە دەستی حیزبی دێمۆكراتدا بە شەكاوەیی ماوەتەوە.
هەر بۆیە پەیمان لەگەڵ گیانی پێشەوا و هەموو شەهیدانی رێگای ئازادی و ڕزگاری خەڵکی کوردستان نوێ دەکەینەوە کە ئاڵای خەباتی ئەوان تا سەرکەوتن بەرز و شەکاوە ڕادەگرین.
سڵاو لە شەهیدانی کوردستان
سڵاو لە بنەماڵەی بەڕێزی شەهیدانی کوردستان
سڵاو لە گیانی پاکی پێشەوای شەهید و هاوڕێیانی.
کۆمیتەی هاوئاهەنگیی رێکخراوە دێموکراتیکەکانی کوردستانی ئێران
۱۰ی خاکەلێوەی ۱۳۹۹ هەتاوی
۲۹ی مارسی ۲۰۲۰ی زایینی.